ചെണ്ട

ഒരു മണലൂറ്റ്‌ ഗ്രാമം

2009-01-13T19:58:00.005+01:00

കൈപ്പള്ളി പോസ്റ്റുചെയ്ത ബോട്ടുകൾ അടുക്കിയിട്ട മനോഹരമായ ഈ നഗരചിത്രം കണ്ടപ്പോൾ കുറേയധികം വള്ളങ്ങൾ യാതൊരു ക്രമവുമില്ലാതെ കടവിലിട്ടിരിക്കുന്ന ഈ ചിത്രം മനസ്സിലോടിയെത്തി; നൈജീരിയയിലെ ഒരു മണലൂറ്റ്‌ ഗ്രാമത്തിൽ നിന്നും.

ആശംസാകാർഡ്

2008-12-24T22:52:00.002+01:00

ക്രിസ്തുമസ് ആശംസകൾ

സ്വാതന്ത്ര്യ പക്ഷി

2008-08-15T12:14:00.003+01:00

സ്വാതന്ത്ര്യ പക്ഷി..
കാവിക്കും പച്ചയ്ക്കുമിടയിൽ സമാധാനം അല്പം കുറഞ്ഞോ എന്നൊരു സംശയം ബാക്കി..!

സമരകാലത്തെ പ്രണയം

2008-06-29T22:43:00.004+01:00

"സരളേ, നീ വീട്ടിൽ പൊയ്ക്കോ, ഇന്ന് സമരമാ, ക്ലാസ്സില്ല"

"അല്ലേൽ എന്നാ ഇപ്പോ ക്ലാസ്സ്‌ നടന്നിട്ടുള്ളത്‌, എന്നും സമരമല്ലേ..! അല്ല റഫീക്ക്‌ ചേട്ടാ, എന്തിനാ ഇപ്പോൾ ഈ സമരം"

"ഹ..ഹ.. അതൊന്നും എനിക്കറിയില്ല, ഞങ്ങളുടെ നേതാവ്‌ എന്ത്‌ പറയുന്നോ, അങ്ങിനെ തന്നെ സിന്ദാബാദ്‌.."

" അത്‌ തന്നെ , ചുമ്മാതല്ല ചേട്ടൻ മൂന്ന് വർഷമായി ഏഴാം ക്ലാസ്സിൽ തന്നെ പഠിക്കുന്നത്‌"

"എടീ അത്‌ കൊണ്ടെന്താ, നമ്മൾ ഇപ്പോൾ ഒരു ക്ലാസ്സിൽ ആയില്ലേ, സരളേ നീയെന്റെ കരളാണ്‌.."

"പിന്നേ, ഒരു കാര്യം പറഞ്ഞേക്കാം, ചേട്ടന്റെ പഞ്ചാരയടി കുറച്ച്‌ കൂടുന്നുണ്ട്‌..!"

"അതിനെന്താ സരള മോളേ, നമുക്ക്‌ വലുതാവുമ്പം കല്യാണം കഴിക്കാം"

"അതെങ്ങിനെ ചേട്ടാ, ഞാൻ ഹിന്ദുവും ചേട്ടൻ മുസ്ലിമുമല്ലേ..?"

"അതു കൊണ്ടൊന്നും കുഴപ്പമില്ല, നമ്മുടെ വറീത്‌ മാഷ്‌ രഹന ടീച്ചറെ കെട്ടിയില്ലേ.., ശൈലജ ടീച്ചറും അജ്‌മൽ സാറും തമ്മിൽ മുടിഞ്ഞ പ്രേമം, ഉടനെ കെട്ടുമെന്നാ കേട്ടത്‌.."

"എന്നാലും.."

"ഒരു എന്നാലുമില്ല, എടീ കല്യാണത്തിനു ജാതീം മതവുമൊന്നും ഇല്ല..,പിന്നെ നമുക്ക്‌ കൊച്ചുണ്ടാവുമ്പോ അവനു 'ജീവൻ' എന്ന് പേരിടേണ്ടി വരും.."

"അതെന്താ, അങ്ങിനെ..?"

"ങാ, അങ്ങിനെ യെന്തൊക്കെയോ പ്രശ്നങ്ങൾ നമ്മുടെ സാമൂഹ്യ പാഠത്തിലുണ്ടന്നൊക്കെ പറഞ്ഞാ ഇപ്പോഴത്തെ ഈ സമരം തന്നെ..നേതാവ്‌ അന്ന് പ്രസംഗിക്കുമ്പോൾ കേട്ടതാ.."

"അപ്പോ കൊച്ച്‌ പെണ്ണാന്നെങ്കിലോ.., എന്ത്‌ പേരിടും.."

"അത്‌ നമുക്ക്‌ മാഷോട്‌ ചോദിക്കാം.."

"അതിനിനി സമരം കഴിയണ്ടേ, സമരമെന്ന് കേട്ടപാടെ മാഷുമാരും ടീച്ചർമ്മാരുമൊക്കെ വീട്ടിൽ പോയി.."

"എന്നാ പിന്നെ നേതാവിനോട്‌ ചോദിക്കാം.. നമ്മുടെ നേതാവ്‌...."

"..........എങ്ങിനെ പറയുന്നോ, അങ്ങിനെ തന്നെ സിന്ദാബാദ്‌....!"

കരിവാരം / black week

2008-06-12T04:15:00.007+01:00

കണ്ണടച്ച്‌ ഇരുട്ടാക്കി പാല്‌ കട്ടുകുടിച്ചിരുന്ന കള്ളപൂച്ചകളുടെ കാലം കഴിഞ്ഞു. ഇത്‌ പകല്‍കൊള്ള നടത്തി പരസ്യവരുമാനം നേടുന്ന കേരള്‍സ്‌ കാലം.

മലയാളം ബ്ലോഗ്‌ എഴുത്തുകാരുടെ കൃതികള്‍ പരസ്യചങ്ങലയില്‍ കോര്‍ത്ത്‌ പ്രദര്‍ശിപ്പിച്ച്‌ പണംവാരുന്ന വെബ്‌ ആഭാസത്തിനെതിരെയും, ബ്ലോഗ്‌ മോഷണത്തിനെതിരെ പ്രതികരിക്കുന്ന ബ്ലോഗര്‍മാരെ വ്യക്തിപരമായി ആക്രമിക്കുന്നതിനെതിരെയും നടത്തുന്ന പ്രതിഷേധത്തില്‍ പങ്ക്‌ ചേരുന്നു.

Joining in the BLACK WEEK protest against blog plagiarism and victimizing malayalam bloggers

REFERENCE LINKS
1 എന്റെ നാലുകെട്ടും തോണിയും: മോഷണം, ഭീഷണി, തെറി, സ്റ്റോക്കിങ്ങ് - ഇനിയെന്തൊക്കെ കേരള്‍സ്.കോം?

2 അഞ്ചല്‍.: കേരള്‍സ് ഡോട് കോം നിര്‍ത്തിയിടത്ത് നിന്നും നാം തുടങ്ങേണ്ടിയിരിക്കുന്നു!

3 കല്ലുസ്ലേറ്റ്: Black week against the black world കറുത്ത ലോകത്തിനെതിരെ കരിവാരം

4 ശേഷം ചിന്ത്യം: Protest against Copyright Violation, Abuse, Threat, and Cyber Stalking by Kerals.com

5 വക്കാരിമഷ്‌ടാ: Protest against the copyright violations, threat, abuse, stalking etc of kerals.com

6 Copyright Violations: Kerals.com – The new wave of plagiarism from blogs

7 മിന്നാമിനുങ്ങുകള്‍-സജി-ബ്ലോഗുകള്‍ കേരളാസ് ഡോട്ട്കോമില്‍

8 ആണ്‍‌മ: Banned from reading my content

9 അഞ്ചല്‍.: സാംസ്കാരിക വകുപ്പ് മന്ത്രിക്ക് ഒരു മലയാള ബ്ലോഗര്‍ സമര്‍പ്പിക്കുന്ന പരാതി.

10 ഋതുഭേദങ്ങള്‍: Bootlegging bloggers posts, Shame on you Kerals dot com

11 ചിതറിയ ചിന്തകള്‍: Are you a thief Mr. www.kerals.com

12 ജനയുഗത്തില്‍ വന്നതു്

13 അഗ്രജന്‍-ബ്ലോഗ്‌ മോഷണം
14 വല്യമ്മായി-content theft by kerals.com

15 Viswam Blacks...: ബ്ലാക്ക് ! Web thugs, Black on you!

കോരന്‍ ശശിയുടെ രൂപത്തില്‍

2007-11-15T20:08:00.000+01:00

വീടുകളുടെ മേല്‍ക്കൂര കോണ്‍ക്രീറ്റ്‌ കഴിയുന്നതും രാവിലെ തന്നെ ചെയ്ത്‌ തീര്‍ക്കാനാണ്‌ എനിക്ക്‌ താത്പര്യം അതിനു വേണ്ടി ചിലപ്പോള്‍ രാവിലെ 6 മണിക്കും മുന്‍പ്‌ തന്നെ പണിക്കാരെ ഏര്‍പ്പാടാക്കും.തട്ട്‌ കോണ്‍ക്രീറ്റ്‌ തുടങ്ങും മുന്‍പ്‌ കമ്പികെട്ടിയിരിക്കുന്നതും മറ്റു ശരിയാണൊ എന്ന് പരിശോധിക്കേണ്ടതുണ്ട്‌. അത്തരം വര്‍ക്ക്‌ അറേഞ്ച്‌മന്റ്‌ നടക്കുന്ന ഒരു വൈകുന്നേരം..

" ശശീ, നാളെ രാജേഷ്‌ കുറച്ച്‌ താമസിച്ചേ എത്തൂ , നീ ആ സോമന്‍ നഗറിലെ കോണ്‍ക്രീറ്റ്‌ ഒന്ന് രാവിലെ പോയി നോക്കികൊള്ളണേ"

"പിന്നെന്ത്‌ സാറേ, ലൊക്കേഷന്‍ പറഞ്ഞാട്ടെ, രാവിലെ തന്നെ ഞാന്‍ സൈറ്റില്‍ എത്തിക്കോളാം"

"സോമന്‍ നഗറില്‍ കേറി ആദ്യത്തെ വളവു കഴിഞ്ഞ്‌ അഞ്ചാമത്തെ വീട്‌, അവിടെ ഇലക്ട്രിക്കല്‍ പൈപ്പിടുന്നവര്‍ രാവിലെ അഞ്ചര മണിക്ക്‌ തന്നെ വരും"

"ശരി, സാര്‍, ഞാന്‍ പോയി നോക്കാം"

ശശി എന്റെ സൈറ്റ്‌ അസിസ്റ്റന്റ്‌, കോണ്‍ക്രീറ്റിനു പോകുന്ന ദിവസം ചെറിയ 'കൈമടക്ക്‌' ഒക്കെ തടയാനിടയുള്ളതിനാല്‍ നല്ല ഉത്സാഹം. കോണ്‍ക്രീറ്റ്‌ ദിവസം അതിരാവിലെ മുതല്‍ കാശുമുടക്കുന്ന ക്ലൈന്റിനെക്കാള്‍ ടെന്‍ഷന്‍ ആണ്‌ എനിക്ക്‌, മഴപെയ്യുമോ, വെള്ളം തികയുമോ,പണിക്കാര്‍ അലമ്പുണ്ടാക്കുമോ..എന്നൊക്കെ.

പിറ്റേന്ന് രാവിലെ ആറരയ്ക്ക്‌ ഒരു ഫോണ്‍, ലൈനില്‍ നമ്മുടെ ശശി തന്നെ
" സാറെ, ഇവിടെ ആര്‌ കമ്പികെട്ടിയത്‌, ഓട്‌ വെച്ച്‌ വാര്‍ക്കലാണന്ന് അറിഞ്ഞൂടെ എവന്മാര്‍ക്ക്‌, ഞാന്‍ മണിയന്‍ മേസ്തിരിയെ പൊക്കികൊണ്ടു വന്ന് കമ്പി അഴിച്ച്‌ കെട്ടികൊണ്ടിരിക്കുവാണ്‌, കോണ്‍ക്രീറ്റ്‌ തുടങ്ങാന്‍ താമസിക്കും, സാറു പതുക്കെ വന്നാല്‍ മതി"

എന്തേലും ചോദിക്കാനോ പറയാനോ കഴിയും മുന്‍പ്‌ ഫോണ്‍ കട്ട്‌, നാണയം ഇട്ട്‌ വിളിക്കുന്ന ഏതോ ലോക്കല്‍ ബൂത്തില്‍ നിന്ന് വിളിച്ചതാണ്‌. ടെന്‍ഷന്‍ കൂടാന്‍ ഇനി വേറെ വല്ലതും വേണോ..! കമ്പികെട്ടുന്നവര്‍ താരതമ്യേന പുതിയ ഒരു ടീം ആയിരുന്നു, എങ്കിലും എല്ലാം വിശദമായി പറഞ്ഞ്‌ കൊടുത്തതുമാണ്‌. കമ്പി കെട്ടുമ്പോള്‍ സാധാരണയായി ചെയ്യുന്ന 6 ഇഞ്ച്‌ -5 ഇഞ്ച്‌ സ്പേസിങ്ങിനു പകരം മേച്ചില്‍ ഓട്‌ ഇടയ്ക്ക്‌ വെച്ച്‌ വാര്‍ക്കുന്ന രീതിയായതിനാല്‍ 13 ഇഞ്ച്‌- 19 ഇഞ്ച്‌ അകലമിട്ടാണ്‌ കമ്പി കെട്ടേണ്ടത്‌, ഇനി അതൊക്കെ അഴിച്ച്‌ കെട്ടി കോണ്‍ക്രീറ്റ്‌ ചെയ്യുമ്പോഴേക്കും എത്രമണിയാകും, ഇന്നത്തെ ദിവസം പോയി..എന്നൊക്കെ ആലോചിച്ച്‌ ഓടിച്ചൊന്ന് ഫ്രഷ്‌ ആയി, 7 മണിയായപ്പോഴേക്കും വണ്ടിയെടുത്ത്‌ സൈറ്റില്‍ എത്തി, അവിടെ ശശിയുടെ പൊടിപോലുമില്ല. സൈറ്റ്‌ ‘എഞ്ചിനീരെ’ സമയത്ത്‌ കാണാത്തതിനാല്‍ കോണ്‍ക്രീറ്റിനു വന്ന പണിക്കാരോട്‌ മെക്കിട്ട്‌ കയറുന്ന മേസ്തിരിയോട്‌ അന്വേഷിച്ചപ്പോള്‍ ശശി അവിടെങ്ങും വന്നിട്ടേയില്ലന്ന് മറുപടിയും. ഉള്ളൊന്ന് കാളി, ഇവന്‍ ഏത്‌ സൈറ്റില്‍ നിന്നാവും രാവിലെ വിളിച്ചത്‌..!

അന്വേഷിച്ച്‌ അധികം ചുറ്റേണ്ടിവന്നില്ല, അതേ നഗറിലെ മറ്റൊരു സൈറ്റില്‍ (വേറെ ആരുടെയോ വര്‍ക്ക് സൈറ്റ്‌ ) തട്ടിന്റെ പുറത്ത്‌ പണിക്കാരെകൊണ്ട്‌ കമ്പി അഴിച്ച്‌ കെട്ടിക്കുന്ന ശശിയെ കണ്ടെത്താന്‍. ആ കെട്ടിടത്തിന്റെ ഉടമസ്ഥന്‍ കുറച്ച്‌ നല്ല മനസ്സുള്ളവനായതിനാലും, അവിടെ കോണ്‍ക്രീറ്റ്‌ പിറ്റേ ദിവസത്തേക്കാണു നിശ്ചയിച്ചിരുന്നത്‌ എന്നതിനാലും അടികൊള്ളാതെ രക്ഷപെട്ടു, പണിക്കാര്‍ക്ക്‌ കുറച്ച്‌ കാശും കൊടുക്കേണ്ടിവന്നെങ്കിലും.

" ശശീ, തന്നോട്‌ ഞാന്‍ പറഞ്ഞതല്ലേ,ഈ നഗറില്‍ കേറി ആദ്യത്തെ വളവു കഴിഞ്ഞ്‌ അഞ്ചാമത്തെ വീടാണെന്ന്?.. മാത്രമല്ല അവിടെ രാവിലെ അവിടെ ഇലക്ട്രിക്കല്‍ പൈപ്പിടുന്നവര്‍ അഞ്ചര മണിക്ക്‌ തന്നെ ഉണ്ടാവുമെന്നും..?"

"അതാണു സാര്‍ എനിക്ക്‌ പറ്റിപ്പോയത്‌, ഞാന്‍ രാവിലെ പരപരാന്ന് വെളുത്തപ്പോഴെ ഇങ്ങ്‌ പോന്നതല്ലേ, ഇവിടെയും ഇലക്ട്രീഷ്യന്മാര്‍ നിന്ന് പൈപ്പിടുന്നുണ്ടായിരുന്നു, പിന്നെ വളവും തിരിവുമൊന്നും ഞാന്‍ നോക്കിയില്ല"

ഇനി നിങ്ങള്‍ പറയൂ, ഈ ശശിയും ഒരു കോരന്‍ അല്ലേ..?

വാല്‍ക്കഷണം: പിന്നെയും 3 വര്‍ഷത്തോളം ഞങ്ങളുടെ ഒപ്പം ഉണ്ടായിരുന്ന ശശി, എന്നും ഓര്‍ക്കാവുന്ന കഥാപാത്രമായി മനസ്സില്‍ ഇന്നും.

ശിശുദിനാശംസകള്‍

2007-11-13T19:26:00.000+01:00

അന്നത്തെ കുട്ടികള്‍ക്കും
ഇന്നത്തെ കുട്ടികള്‍ക്കും
കുട്ടികളായിട്ടും കുട്ടിത്തം
മാറാത്തവര്‍ക്കും..

ശിശുദിനാശംസകള്‍..!!

കന്യാകുമാരി - മഴ

2007-11-01T18:23:00.000+01:00

“കടലില്‍ മഴ പെയ്യുന്നത്‌ കണ്ടിട്ടുണ്ടോ..?”
“മഴയുടെ സൗമ്യ ശബ്ദം കടല്‍തിരമാലകളുടെ ഹുങ്കാരത്തില്‍ അലിഞ്ഞില്ലാതാവുന്നത്‌ അറിഞ്ഞിട്ടുണ്ടോ..? ”
“മഴയുടെ നനുത്ത ആവരണം കടലിനെ മറയ്ക്കുന്നത്‌ കാണാനെന്ത്‌ രസമാണന്നോ..?”
കടല്‍തീരത്തെ ഹോസ്റ്റലില്‍ പ്രീഡിഗ്രി കാലത്തെങ്ങോ താമസിച്ച അനുഭവത്തില്‍ പ്രണയത്തെ പുല്‍കിയ നാളുകളിലെന്നോ അവള്‍ സംസാരിച്ച്‌ കൊണ്ടേയിരുന്നപ്പോള്‍ സതീഷ്‌ ബാബു പയ്യന്നൂരിന്റെ 'മഴയുടെ നീണ്ടവിരലുകളിലെ’ വരികള്‍ ഞാന്‍ ഓര്‍മ്മിച്ചു..
"മനസ്സില്‍ പ്രണയമുള്ളവര്‍ മഴ നനഞ്ഞ്‌ കടല്‍ക്കരവരെ പോകണം"

പ്രണയം ദാമ്പത്യത്തിനു വഴിമാറിയിട്ടും ഒരിക്കലും ഒരു മഴക്കാലത്തും കടല്‍കരയില്‍ പോകാനായില്ല, മഴയും കടലും ഒരുമിക്കുന്നത്‌ അറിയാനുമായില്ല.

മക്കളുടെ നിര്‍ബന്ധത്തിനു വഴങ്ങി രണ്ട്‌ ദിവസം മുന്‍പ്‌ കന്യാകുമാരിയില്‍ എത്തുമ്പോള്‍ മഴ ചാറി തുടങ്ങിയിരുന്നു.കടലിലേക്ക്‌ നല്ല ദര്‍ശനമുള്ള മുറികിട്ടിയപ്പോള്‍ കരുതിയില്ല,കടലുകളുടെ സംഗമസ്ഥാനത്തു തന്നെ മഴ ഇത്രമേല്‍ ദൃശ്യ വിസ്മയമൊരുക്കി ഞങ്ങളെയും കാത്തിരിക്കുന്നുവെന്ന്.

ഹോട്ടല്‍ മുറിയുടെ മൂന്ന് ചുവരുകളുടെ സ്വകാര്യതയ്ക്ക്‌ മേലെ നാലാം ചുവരിനു പകരം തീര്‍ത്ത ബാല്‍ക്കണിയിലൂടെയുള്ള കടലിന്റെ വിശാലമായ കാഴ്ച, താളം ചവിട്ടി പതഞ്ഞ്‌ ഇറങ്ങുന്ന മഴ, ഏറെ നേരം നോക്കിനിന്നാല്‍ കടല്‍ വെള്ളം കാറ്റില്‍ ആടിയുലയുന്ന മഴനാരുകളില്‍ അള്ളിപ്പിടിച്ച്‌ മുകളിലേക്ക്‌ കയറുന്നത്‌ പോലെ തോന്നും.മുറിയിലെ ശീതികരണിയുടെ മുരള്‍ച്ചെയെക്കാളും തണുപ്പിനെക്കാളും മഴയുടെ വശ്യതയും താളവും തെന്നലും മക്കള്‍ക്കും സുഖകരമായി തോന്നി.

മഴനൂലുകളില്‍ തീര്‍ത്ത തിരശീലയുടെ നനുത്ത മറവില്‍ വിവേകാനന്ദപാറയുടെയും മണ്ഡപത്തിന്റെയുമൊക്കെ വിദൂരകാഴ്ചയ്ക്‌ ഭംഗിയേറിയത്‌ പോലെ.

മഴയുടെ ശക്തികുറഞ്ഞ വൈകുന്നേരം , ചാറ്റല്‍ മഴയില്‍ കൈകള്‍കോര്‍ത്ത്‌ കടല്‍ക്കരയിലെ കരിങ്കല്‍ ഭിത്തിയില്‍ ചാഞ്ഞിരിക്കുമ്പോള്‍ ഞാന്‍ ഓര്‍മ്മിപ്പിച്ചു " മനസ്സില്‍ പ്രണയമുള്ളവര്‍ മഴ നനഞ്ഞ്‌ കടല്‍കര വരെ പോകണം"

മഴ തുള്ളികള്‍ക്കൊപ്പം തുള്ളികളിക്കാന്‍ കിട്ടിയ അവസരം നഷ്ടപെടുത്താതെ ചാടിതിമിര്‍ക്കുന്ന മക്കള്‍ ബാല്യകാല മഴയനുഭങ്ങളുടെ സ്മരണയുണര്‍ത്തി. ഇടയ്ക്കെപ്പോഴോ സുവര്‍ണ്ണവെളിച്ചം വിതാനിച്ച്‌ സൂര്യന്‍ പോയ്‌മറഞ്ഞു.കാര്‍മേഘചിന്തുകള്‍ക്കിടയില്‍ മുങ്ങിപ്പോയ സൂര്യാസ്തമന കാഴ്ചകളോടൊപ്പം ജല തര്‍പ്പണം നടത്തുന്നവരുടെ നിഴല്‍ രൂപങ്ങള്‍.

തിരികെ മുറിയിലെത്തി ബാല്‍ക്കണിയില്‍ ഇരുന്ന് കടലിന്റെ പാട്ട്‌ കേട്ട്‌, തിരമാലകളുടെ താളമറിഞ്ഞ്‌, വൈദ്യുതപ്രഭയില്‍ അലങ്കരിച്ച വിവേകാനന്ദ സ്മാരകത്തിന്റെ ദൃശ്യമാസ്വദിച്ച്‌, അകലെയെവിടുന്നോ, കനംതൂങ്ങിയ ഇരുളില്‍ പിച്ചവെച്ച്‌ കടന്ന് വരുന്ന മഴയെയും കാത്ത്‌..പിന്നെ, പുലരിയുടെ വര്‍ണ്ണാഭമാര്‍ന്ന വരവിനു കാതോര്‍ത്ത്‌, കണ്ണ് പൂട്ടി മഴയോടൊപ്പം ഒരു രാത്രി..!!

അക്ഷരം ആശംസകള്‍

2007-10-21T07:48:00.000+01:00

അക്ഷരങ്ങളുടെ
അറിവിന്റെ
വിസ്മയലോകത്തേക്ക്‌
ഹരിശ്രീ കുറിച്ചെത്തുന്ന
കുരുന്നോമനകള്‍ക്ക്‌

ആശംസകളോടെ

അലിഫ്‌, ഷംല, ആദില്‍ & അഫ്ര

ഈദ് ആശംസകള്‍

2007-10-12T13:56:00.000+01:00

ഈദ് ആശംസകള്‍

'മാല്‍ക്കമിന്റെ അഞ്ച്‌ - അഞ്ച്‌ വിജയം'

2007-10-02T13:13:00.000+01:00

ഇരുപത്‌ ഇരുപതില്‍ ഇന്ത്യയുടെ ആദ്യമത്സരം നടക്കേണ്ടിയിരുന്ന - സ്കോട്ട്‌ലന്‍ഡുമായി- ദിവസമാണ്‌ മാല്‍ക്കമിനെ പരിചയപ്പെടേണ്ടി വന്നത്‌, അത്‌ തികച്ചും യാദൃശ്ചികമൊന്നുമല്ല, അയാള്‍ മനപൂര്‍വ്വം ഇങ്ങോട്ട്‌ കയറി മുട്ടിയതാണ്‌. ഫെഡറല്‍ ലൈറ്റ്‌ ടെര്‍മിനല്‍ എന്ന എഫ്‌.എല്‍.റ്റി പോര്‍ട്ടിലൂടെ പതിവല്ലാത്ത സൈറ്റ്‌ പരിശോധനയ്ക്കിടെ ഒരു ബ്ലാക്കന്‍ വന്ന് “ഇന്നല്ലേ നിങ്ങളുടെ ആദ്യ മത്സരം, കാണാന്‍ പോകുന്നില്ലേ” എന്ന് ചോദിച്ചപ്പോള്‍ സത്യമായിട്ടും ഞാന്‍ ഒന്ന് ഞെട്ടി.. മാത്രവുമല്ല അവനെ കൊണ്ട്‌ ഒന്നൂടെ അത്‌ പറഞ്ഞ്‌ കേട്ടിട്ടേ എനിക്ക്‌ സംഭവം മനസ്സിലായതുമുള്ളൂ.

ഇതുവരെയും ഒരു നൈജീരിയക്കാരന്‍ ക്രിക്കറ്റിനെ കുറിച്ച്‌ സംസാരിക്കുന്നത്‌ കേട്ടിട്ടില്ലാത്തതിനാലും ഇവനെ കണ്ടാല്‍ ആളു കറുപ്പാണെങ്കിലും നൈജീരിയക്കാരനാവാന്‍ വഴിയില്ലാത്തതിനാലും 'എവിടാ വീട്‌, സൗത്ത്‌ ആഫ്രിക്കയാ' എന്നാണു ചോദിച്ചതെങ്കിലും വെളിയില്‍ വന്നത്‌ 'എന്താ പേര്‌' എന്നാണ്‌. “ഐ ആം മാല്‍ക്കം, മാല്‍ക്കം ഡേവിഡ്‌ ” എന്നൊരുമാതിരി ജയിംസ്‌ ബോണ്ട്‌ സ്റ്റൈലില്‍ മൊഴിഞ്ഞത്‌ കേട്ടപ്പോള്‍ മനസ്സിലൊരു മിന്നായം..അത്‌ തന്നെ, മാല്‍ക്കം മാര്‍ഷലിന്റെ നാട്ടുകാരനാവണം ഇവന്‍.. "വെസ്റ്റ്‌ ഇന്‍ഡീസ്‌ ആണല്ലേ..?" എന്ന എന്റെ ഒറ്റ ചോദ്യത്തില്‍ അവന്‍ പുളകിതനായി. പിന്നെ പരിചയപ്പെടലായി, ക്രിക്കറ്റായി, എന്തിനു, അന്ന് രാവിലത്തെ അവരുടെ ടീമിന്റെ ബംഗ്ലാദേശുമായുള്ള മത്സരത്തെ കുറിച്ച്‌ പറഞ്ഞ്‌ ആശാന്‍ കുറച്ച്‌ സെന്റിയുമായി. പിന്നെ എപ്പോള്‍ പോര്‍ട്ടിലൂടെ പോകുമ്പോഴും, ക്യാമ്പിലും , റെസ്റ്റാറന്റിലുമെവിടെ വെച്ച്‌ കണ്ടാലും ഒരു 'ഹായ്‌' ഉം കളിയെ കുറിച്ചൊരു ചെറു അവലോകനവും തമ്മില്‍ പതിവായി.

ഇന്ത്യയുടെ മിക്ക കളികളും- ന്യൂസിലാണ്ടുമായിട്ടുള്ളതൊഴിച്ച്‌ - ഇവിടുത്തെ സമയം വൈകിട്ട്‌ 5 മണി കഴിഞ്ഞായത്‌ ഓഫീസ്‌ വിട്ട്‌ ക്യാമ്പിലെത്തി നേരെ റ്റി.വി. തുറന്ന് അതിന്റെ മുന്നിലിരിക്കാന്‍ പ്രേരിപ്പിച്ചു,കാരണം മാല്‍ക്കമിനോടൊപ്പം പിടിച്ച്‌ നില്‍ക്കണ്ടേ..! ആദ്യ റൗണ്ടില്‍ തന്നെ വെസ്റ്റ്‌ ഇന്‍ഡീസ്‌ പുറത്തായത്‌ മാല്‍ക്കമിനെ വിഷമത്തിലാക്കിയെങ്കിലും 'ഇന്‍ഡീസ്‌' കൂടെയുള്ളതിനാല്‍ ഇന്ത്യന്‍ കളികള്‍ കാണാന്‍ അയാള്‍ക്കും പ്രേരണയായിട്ടുണ്ടാവണം.

ക്രിക്കറ്റ്‌ കളിയില്ലാത്ത ഒരു നാട്ടില്‍ വെച്ച്‌ ക്രിക്കറ്റ്‌ കളിയില്‍ ഒരു കാലത്തെ കിടിലങ്ങളായ നാട്ടുകാരനില്‍ നിന്നും തുടര്‍ച്ചയായി 'കണ്‍ഗ്രാചുലേഷന്‍സ്‌' കിട്ടുന്നതില്‍ എന്നിലെ ഇന്ത്യക്കാരന്‍ അഭിമാനം കൊണ്ടു, രോമാഞ്ചകഞ്ചുകിതനായി. ഇന്ത്യ ഫൈനലില്‍ എത്തി, അല്ലെങ്കില്‍ ഞാനും കൂടി പ്രാര്‍ത്ഥിച്ച്‌ എത്തിച്ചു..(കുറച്ച്‌ ക്രഡിറ്റ്‌ എനിക്കും ഇരിക്കട്ടെന്നേ..!) ഫൈനല്‍ മത്സരം ഇവിടുത്തെ സമയം ഉച്ചയ്ക്ക്‌ ഒരു മണിയ്ക്ക്‌ ആയതിനാല്‍ അന്നത്തെ എന്റെ സൈറ്റ്‌ പരിശോധന മൊത്തമായും താമസിക്കുന്ന ക്യാമ്പിനകത്താക്കി ഷെഡ്യൂള്‍ ചെയ്തു ( ബുദ്ധിമാനും, കമ്പനിയോട്‌ കൂറുമുള്ള പണിക്കാരനുമല്ലേ ഞാന്‍..!) മാല്‍ക്കം അന്ന് വൈകിട്ട്‌ നേരത്തെ എത്താമെന്ന് ഉറപ്പ്‌ നല്‍കി ഉച്ചക്ക്‌ പിരിഞ്ഞു.

ഇന്ത്യ വിജയിച്ചതിന്റെ ആഹ്ലാദത്തില്‍ , റെസ്റ്റാറന്റിലേക്ക്‌ പോകും വഴിയാണ്‌ പിന്നെ മാല്‍ക്കമിനെ കണ്ടത്‌. പതിവ്‌ അഭിനന്ദനങ്ങള്‍ക്കൊപ്പം ഒരു ‘ഹസ്തതാഢനവും’ (എന്നാ ആരോഗ്യമാ ഇവന്റെ ഒക്കെ കൈക്ക്‌, കൈ കൊടുത്താല്‍ ഒടിച്ച്‌ പറിച്ചാണു തിരികെ കിട്ടുക..!!)
"ഉഗ്രന്‍ കളിയായിരുന്നല്ലേ, എന്നാ ടെന്‍ഷന്‍ ആയിരുന്നു..അഞ്ചേ-അഞ്ചിനല്ലേ കപ്പടിച്ചത്‌.." മാല്‍ക്കത്തിന്റെ ഹൈലൈറ്റ്‌സ്‌ കമന്ററി കേട്ടപ്പോള്‍ ഒന്ന് ഞെട്ടി, കൂടെയുണ്ടായിരുന്ന ക്രിക്കറ്റ്‌ ആരാധകനായ സുഹൃത്ത്‌ (ഇദ്ദേഹം കോളേജിലെ ക്രിക്കറ്റ്‌ ടീമിലൊക്കെ അംഗമായിരുന്നു) കുറച്ച് കൂടി വലുതായി തന്നെ ഞെട്ടി. ഇവനേത്‌ കളിയുടെ കാര്യമാണീ പറയുന്നത്‌, ക്രിക്കറ്റ് അല്ലന്നുറപ്പ്, ഇനി സാനിയ വല്ലയിടത്തും പോയി ഗപ്പ് അടിച്ചോ.,ഫുട്ബോളിലുമൊക്കെ അഞ്ച്‌- അഞ്ച്‌ എന്നാല്‍ സമനിലയല്ലേ, ജയമല്ലല്ലോ; ദൈവമേ ,ഇവനു വട്ട്‌ ആയോ..?

ഞങ്ങളുടെ ഞെട്ടല്‍ കണ്ടിട്ടാവും, മാല്‍ക്കം തന്നെ വിശദീകരിച്ചു.."അഞ്ചു റണ്‍സിനും അഞ്ച്‌ വിക്കറ്റിനുമൊക്കെ ഒരു ഫൈനല്‍ ജയിക്കുകാന്ന് വെച്ചാല്‍ ചില്ലറ കാര്യമാന്നോ..!!"
ഓ, അപ്പോ അതാണു കാര്യം, ഇന്ത്യക്ക്‌ അവസാനം മിച്ചമുണ്ടായിരുന്ന അഞ്ച്‌ വിക്കറ്റിനും, പിന്നെ പാകിസ്ഥാനു നേടാന്‍ കഴിയാതെ പോയ ആ ചില്ലറ അഞ്ചു റണ്‍സിനും വിജയിച്ചു എന്നാണു മാല്‍ക്കം മാര്‍ഷലിന്റെ നാട്ടുകാരനും പേരുകാരനുമായ ഈ പഹയന്‍ വിചാരിച്ച്‌ വെച്ചിരിക്കുന്നത്‌.

അവനെ ബോധവല്‍ക്കരിക്കാന്‍ തുനിഞ്ഞ സുഹൃത്തിനെ ഞാന്‍ തന്നെ വിലക്കി, കിട്ടിയ 'അഭിനന്ദനങ്ങളും' ഞെരിഞ്ഞമര്‍ന്ന് പടമായ കൈപ്പത്തിയിലൊരു ചെറു തിരുമലുമായി പതുക്കെ സ്ഥലം കാലിയാക്കി.മാല്‍ക്കത്തിനെ കുറ്റം പറയാനും പറ്റില്ല, അഭിനവ ക്രിക്കറ്റ്‌ കളിയുടെ ആദ്യപാദത്തില്‍ ഇന്ത്യ ഇതേ പാകിസ്ഥാനെ തോല്‍പ്പിച്ചത്‌ മൂന്ന്-പൂജ്യം എന്ന ക്രമത്തിലായിരുന്നില്ലേ..!

വിജയശ്രീലാളിതരായി നാട്ടിലെത്തിയ താരങ്ങള്‍ക്ക്‌ മുംബൈയില്‍ സ്വീകരണമൊരുക്കി രാഷ്ട്രീയ'മാല്‍ക്കം' മാര്‍ വേദിയുടെ മുന്‍നിരയില്‍ ഞെളിഞ്ഞിരിക്കുന്നത്‌ കണ്ടപ്പോഴും സംശയം ബാക്കി..അല്ല, ഇനി ഇന്ത്യ ജയിച്ചത്‌ അഞ്ചേ-അഞ്ചിനാണോ..?!!

പോസ്റ്റ്‌ ഡിലീറ്റാനുണ്ടോ.. പോസ്റ്റ്‌..!!

2007-09-07T14:03:00.000+01:00

ബ്ലോഗ്‌ എന്നത്‌ ഒരു സ്വതന്ത്ര മാദ്ധ്യമം എന്ന നിലയ്ക്കാണ്‌ പലപ്പോഴും പ്രതിപത്തി തോന്നീട്ടുള്ളത്‌, ഇത്‌ വിഭാവനം ചെയ്തവരും അത്‌ തന്നെയാണുദ്ദേശിച്ചിട്ടുള്ളത്‌ എന്നാണ്‌ ഈ ചുരുങ്ങിയ ഒരു വര്‍ഷക്കാലം കൊണ്ട്‌ മനസ്സിലാക്കുവാന്‍ കഴിഞ്ഞതും. ആദ്യകാല പ്രയോക്താക്കളില്‍ പലരും ഇതിനെ ഒരു ഡയറികുറിപ്പിന്റെ ലാഘവത്തിലവതരിപ്പിച്ചത്‌ ബ്ലോഗ്‌ എന്ന മാദ്ധ്യമത്തെ ലക്ഷ്യപ്രാപ്തിയിലേക്കെത്താന്‍ സഹായിച്ചില്ല, ഇനിയും സഹായിക്കില്ല എന്ന് തന്നെയാണ്‌ ഞാന്‍ മനസ്സിലാക്കുന്നത്‌.

മലയാളം ബ്ലോഗ്‌ എന്നത്‌ ഭാഷയുടെ വളര്‍ച്ചയ്ക്ക്‌ സഹായകരമായ രീതിയിലേക്കും കൂടി, അക്ഷരമില്ലാതെ അനന്തതയില്‍ ലയിച്ച ലോകത്തെ നിരവധി ഭാഷാ കൂട്ടങ്ങളില്‍ ഒന്നാകരുതേ മലയാളം എന്ന പ്രാര്‍ത്ഥനയ്ക്കും ഇടമുണ്ടാക്കി. എത്ര പെട്ടന്നാണ്‌ മലയാളം ബ്ലോഗിംഗ്‌ തലം ഇത്രമാത്രം എഴുത്തുകാരെയും വായനക്കാരെയും സൃഷ്ടിച്ചത്‌. വിജ്ഞാനം വിരല്‍തുമ്പിലെത്തിനില്‍ക്കുന്ന ഈ വിവരസാങ്കേതികയുഗത്തിലും ഭാഷയോടുള്ള അഭിനിവേശം എഴുത്തിലൂടെയും വായനയിലൂടെയും പങ്ക്‌ വെയ്ക്കുന്ന പല തലമുറകളില്‍ പെട്ടവരെയും കോര്‍ത്തിണക്കാന്‍ ബ്ലോഗിംഗ്‌ സമ്പ്രദായത്തിനു കഴിഞ്ഞു എന്നതൊരു ചെറുതല്ലാത്ത വലിയ കാര്യമാണ്‌. പക്ഷേ, ഈ മാദ്ധ്യമത്തെ കസ്റ്റമൈസ്‌ ചെയ്ത്‌ ചെയ്ത്‌ മിക്ക ബ്ലോഗര്‍മാരും ഇന്ന് അതിര്‍വരമ്പുകളില്ലാത്ത സ്വാതന്ത്ര്യത്തിന്റെ അങ്ങേയറ്റത്ത്‌ ചെന്ന് മൂക്കും കുത്തി താഴോട്ട്‌ വീഴുന്നപോലെ..!

പലപ്പോഴും കണ്ടിട്ടുള്ള ഒരു പ്രവണതയാണ്‌ വിവാദങ്ങളോ വിമര്‍ശനങ്ങളോ ഉണ്ടാകുമ്പോള്‍ ബ്ലോഗിലെ പോസ്റ്റുകളോ, ബ്ലോഗ്‌ തന്നെയോ ഡിലീറ്റ്‌ ചെയ്യാനുള്ള ആവശ്യങ്ങള്‍ ഉയരുന്നത്‌. മിക്കപ്പോഴും ഇത്‌ സീനിയര്‍ ബ്ലോഗര്‍മാര്‍ എന്ന് വിശേഷിപ്പിക്കുന്നവരുടെ ഭാഗത്ത്‌ നിന്നുമായിരിക്കും എന്നത്‌ എന്നെ അത്ഭുതപ്പെടുത്തുന്നു. ഒരാള്‍ ഒരു കുറിപ്പ്‌ കഥയോ കവിതയോ, ലേഖനമോ എന്തെങ്കിലുമായികൊള്ളട്ടെ, അയാളുടെ ബ്ലോഗില്‍ പ്രസിദ്ധീകരിക്കുന്നു. രാജ്യസുരക്ഷാ താത്പര്യത്തിനെതിരും ജാതി,മത രാഷ്ട്ര തീവ്രവാദ പ്രവര്‍ത്തനങ്ങള്‍ക്ക് അനുകൂലവുമൊക്കെയായ നിലപാടുകളൊന്നും തന്നെയില്ലെങ്കില്‍ ആര്‍ക്കും ആരോടും ആവശ്യപ്പെടാനാകില്ല, ആ കുറിപ്പ്‌ ഡിലീറ്റ്‌ ചെയ്യുവാന്‍. ഈ പ്രസിദ്ധീകൃതമായ കുറിപ്പിനു ചുവട്‌ പിടിച്ച്‌ നല്ലതും ചീത്തയും, അപകീര്‍ത്തികരവുമായ കമന്റുകള്‍ വരാം , വരാതിരിക്കാം, അതിനു പോസ്റ്റിടുന്നയാള്‍ ഉത്തരവാദിയായിരിക്കുമോ..? അഥവാ അങ്ങിനെ സഹബ്ലോഗര്‍മാരുടെ ധാര്‍മ്മികസമരം കണക്കിലെടുത്ത്‌ ഡിലീറ്റ്‌ ചെയ്യപ്പെട്ട ഒരു പോസ്റ്റ്‌ , അതിന്റെ ഓഫ്‌ലൈന്‍ കോപ്പി സൂക്ഷിച്ച്‌ വെച്ചിരുന്ന യാതൊരു ധാര്‍മ്മികമൂല്യ ബോധവുമില്ലാത്ത മറ്റൊരു ബ്ലോഗര്‍ അത്‌ പൂര്‍ണ്ണമായോ,ഭാഗികമായോ പബ്ലിഷ്‌ ചെയ്താല്‍ ആര്‍ക്ക്‌ എന്തു ചെയ്യാന്‍ കഴിയും?

പോസ്റ്റുകള്‍ ഡിലീറ്റ്‌ ചെയ്യുന്നത്‌ കൊണ്ടുള്ള ലാഭം, ആവശ്യമില്ലാതെ കമന്റ്‌ ചങ്ങലകള്‍ സൃഷ്ടിച്ച്‌ ഖ്യാതി നേടുന്നവര്‍ക്കും, അനോണി മുഖമൂടിയിലൊളിച്ചിരുന്ന് തമ്മിലടിപ്പിക്കുന്ന ചോരകൊതിയന്മാര്‍ക്കും മാത്രം..! നഷ്ടം, ചില അവസരങ്ങളിലെങ്കിലും നല്ല നല്ല പോസ്റ്റുകളുടെ തുടര്‍വായനക്കാര്‍ക്കും, ബ്ലോഗ്‌ മൊത്തമായി പൂട്ടികെട്ടി ഒളിച്ചോടേണ്ടി വരുന്ന സൃഷ്ടികര്‍ത്താക്കള്‍ക്കും. വേറൊന്ന്, ഏതെങ്കിലും പോസ്റ്റിലൂടെ വ്യക്തിഹത്യയെ നേരിടേണ്ടി വന്നവര്‍ക്ക്‌ ആ പോസ്റ്റ്‌ ഡിലീറ്റ്‌ ചെയ്തു എന്നത്‌ കൊണ്ട്‌ മാത്രം പോയ മാനം തിരിച്ചും കിട്ടുമെന്ന് കരുതാനും വയ്യ..!

കേവലം വ്യക്തി ബന്ധങ്ങളിലധിഷ്ഠിതമായ കെട്ടുപാടുകളില്‍ നിന്ന് ബ്ലോഗ്‌ പോസ്റ്റുകളെ മോചിപ്പിച്ചേ മതിയാകൂ. ബ്ലോഗറുടെ സൃഷ്ടികളെ അയാളുടെ കമന്റ്‌ ഓപ്‌ഷന്‍ തുറന്ന് വെച്ചിരിക്കുന്നിടത്തോളം ആര്‍ക്കും വിമര്‍ശിക്കാം, വിശകലനം ചെയ്യാം. അല്ലാതെ അയാളുടെ വ്യക്തിപരമായ കാര്യങ്ങളില്‍ ഇടപെടാന്‍ , അതിനി എന്തുതന്നെയായികൊള്ളട്ടെ, സഹബ്ലോഗര്‍മാര്‍ക്ക്‌ അവകാശമില്ല എന്ന് തന്നെയാണ്‌ ഞാന്‍ കരുതുന്നത്‌. പറയുമ്പോള്‍, സ്വതന്ത്രമാദ്ധ്യമാണ്‌ ബ്ലോഗ്‌, എഡിറ്റര്‍മാരില്ലാതെ, സ്വയം പബ്ലിഷര്‍ ആകാനുള്ള സ്വാതന്ത്ര്യം..പക്ഷേ ഈ പോസ്റ്റ്‌ ഡിലീറ്റ്‌ ആക്രോശങ്ങളില്‍ അതൊക്കെയും ഇല്ലാതായി പോകുന്നില്ലേ എന്നൊരു സന്ദേഹം..!

ഈയിടെ കണ്ട്‌ വരുന്ന മറ്റൊരു പ്രവണത,ഒരു ബ്ലോഗര്‍ അവതരിപ്പിച്ച ഏതെങ്കിലും സൃഷ്ടിയില്‍ നിന്നും ചില ഭാഗങ്ങള്‍ അടര്‍ത്തിയെടുത്ത്‌ അയാളെ പോസ്റ്റിലൂടെയും, കമന്റിലൂടെയുമെല്ലാം തേജോവധം ചെയ്യാനുപയോഗിക്കുക എന്നുള്ളതാണ്‌.ഞാന്‍ എന്ന കഥാപാത്രം ചിലപ്പോള്‍ കള്ളുകുടിയനോ പെണ്ണുപിടിയനായോ അവതരിച്ചാല്‍, അല്ലെങ്കില്‍ അത്തരമൊരു കഥാപാത്രത്തെ അവതരിപ്പിച്ചാല്‍ , ഞാന്‍ ഫുള്‍ടൈം കള്ളും കുടിച്ച്‌, പെണ്ണും പിടിച്ച്‌ നടക്കുന്ന ഒരാളുടെ പ്രതിരൂപമായി മാറുമോ..? ഇതിനു കമന്റ്‌ ചെയ്യുന്നവരെയും കുറ്റം പറഞ്ഞിട്ട്‌ കാര്യമില്ല, മൂലകാരണം -ബ്ലോഗെന്നാല്‍ കേവലം ഡയറി കുറിപ്പുകളെന്നപോലെ ലഘൂകരിക്കപ്പെട്ടത്‌ തന്നെയാവണം,ആത്മകഥാംശം കലര്‍ന്ന കുറിപ്പുകളുടെ ധാരാളിത്വവും..!

സൃഷ്ടികര്‍ത്താക്കളുടെ വ്യക്തിപരമായ കാര്യങ്ങളെയാണ്‌ നമ്മള്‍ അളവുകോലാക്കിയിരുന്നതെങ്കില്‍, സാഹിത്യവും കലയുമൊക്കെ ആസ്വാദകരില്ലാതെ, വിമര്‍ശകരില്ലാതെ എന്നേ മണ്‍മറഞ്ഞ്‌ പോയേനെ. ബ്ലോഗിലൂടെ വായിക്കാന്‍,അറിയാന്‍, ആസ്വദിക്കാന്‍ അല്ലെങ്കില്‍ വിമര്‍ശിക്കുവാന്‍ താത്പര്യപ്പെടേണ്ടത്‌ ബ്ലോഗറെയല്ല,മറിച്ച്‌ അവരുടെ പോസ്റ്റുകളെയാണ്‌. സമൂഹജീവികളെന്ന നിലയില്‍ വ്യക്തിബന്ധങ്ങള്‍ പലതും ഇതിനിടയിലൂടെ ഉടലെടുക്കുന്നുണ്ടാകാം,കൂട്ടായ്മകളും. അത്‌ പോസ്റ്റുകളെയും, കമന്റുകളെയും ബാധിക്കുന്നതലത്തിലേക്ക്‌ കടന്നാല്‍ ഈ പറയുന്ന 'സ്വാതന്ത്ര്യം' ബ്ലോഗ്‌ എന്നല്ല, ഒരു മാദ്ധ്യമവും നമുക്ക്‌ നല്‍കില്ല.

വാല്‍ക്കഷണം:
മലയാള ഭാഷയെ പരിപോഷിപ്പിക്കാന്‍ ബ്ലോഗ്‌ എഴുത്തിന്റെ ആവശ്യമുണ്ടോ,സ്വന്തം കുട്ടികളുള്‍പ്പെടെ ഒരു എട്ട്‌ പത്ത്‌ കുട്ടികള്‍ക്ക്‌ മലയാളം അക്ഷരമാല പഠിപ്പിച്ച്‌, അവരെ വായിക്കാനും എഴുതാനും പ്രാപ്തരാക്കിയാല്‍ പോരെ..?!

ദുര്‍ബുവിന്റെ ധര്‍മ്മസങ്കടം

2007-04-27T11:34:00.000+01:00

ഡയറിതാളുകളിലെ തുറന്നെഴുത്തിലൂടെ , തന്റെ കൗമാരകാലത്തേക്ക്‌ സഞ്ചരിക്കുന്ന ദുര്‍ബലന്‍ പലപ്പോഴും സമാനതകളുള്ള ഓര്‍മ്മകള്‍ക്ക്‌ ചിറക്‌ മുളപ്പിക്കുന്നു. വളരെ സാദൃശ്യമുള്ള ഒരു ചക്ക സംഭവം വിവരിക്കുന്ന കുറിപ്പ്‌, അറിഞ്ഞോ അറിയാതയോ എനിക്ക്‌ സമര്‍പ്പിച്ചിരിക്കുന്നത്‌ വായിച്ചപ്പോള്‍ തോന്നിയ ഒരു സ്കെച്ച്‌..വെറുതെ കോറിയിടുന്നു.

സമര്‍പ്പണം: ദുര്‍ബുവിന്റെ 28കാരി ജയനി ക്ക്‌.

ബ്ലോഗ്‍ ടൂണ്‍സ് - 1

2007-03-19T07:43:00.000+01:00

ഈ ചിത്രം പികാസ വെബ്ബില്‍

An architects view towards Yahoo India's blog Content Theft

2007-03-05T07:45:00.000+01:00

An architects view towards Yahoo India's blog Content Theft

ഈ ചിത്രം പികാസ വെബില്‍

എന്‍റെ പ്രതിഷേധകുറിപ്പ്:

സൂര്യഗായത്രിയെന്ന സു വിന്റെ കറിവേപ്പിലയിലെ പാചകകുറിപ്പുകള്‍ വെബ്‌ ദുനിയ എന്ന സ്ഥാപനത്തിന്റെ ഒത്താശയോടെ കൊത്തിക്കൊണ്ട്‌ പോവുകയും , അവരുടെ ഭാരതീയ പോര്‍ട്ടലിലെ മലയാളഭാഷാ വിഭാഗത്തില്‍ പ്രസിദ്ധീകരിക്കുകയും , ഇത്‌ ശരിയാണോ യാഹൂ എന്ന് ചോദിച്ചാല്‍,"അതൊക്കെ അങ്ങ്‌ ദുനിയാവില്‍ പോയി പറഞ്ഞാമതി" എന്ന് സമീപനം സ്വീകരിക്കുകയും ചെയ്യുന്ന യാഹൂ എന്ന ആഗോളകഴുകന്റെ ധിക്കാരപരമായ തിളപ്പിനെതിരെയല്ല എന്റെ പ്രതിഷേധം.

വിരുന്നുകാരന്‌ ഹോട്ടലില്‍ നിന്നും ഭക്ഷണം വരുത്തികൊടുത്ത്‌ 'ഹോ ഇതൊക്കെ എന്റെ ഭാര്യയുടെ കൈപ്പുണ്യമെന്ന്' മേനിനടിക്കുകയും, "നിങ്ങളുടെ മകന്‍ ഇപ്പോ ഹോട്ടലില്‍ നിന്നും വാങ്ങിവന്നതല്ലേ ഇതൊക്കെ" എന്ന ചോദ്യത്തിന്‌ 'അവന്‍ കുഞ്ഞല്ലേ, ക്ഷമിച്ചുകള' എന്ന എങ്ങുംതൊടാത്ത ഒരു ഉത്തരം കൊടുക്കുകയും ചെയ്യുന്ന വെബ്‌ദുനിയ എന്ന വീട്ടുകാരനോടുമല്ല, എന്റെ പ്രതിഷേധം.

കോണ്‍വെന്റ്‌ സ്കൂളുകളില്‍ അടവെച്ച്‌ വിരിയിച്ചെടുക്കുന്ന 'ഞാന്‍, എന്റെ, എനിക്ക്‌' പോളിസിക്കാരായ കുട്ടികള്‍, സര്‍ക്കാര്‍ സ്കൂളിലെ കുട്ടികളുടെ അവകാശപോരാട്ടങ്ങളെ കാണുംമട്ടിലും നയിക്കുന്നതാരെന്ന് നോക്കിയും വ്യക്തിതാല്‍പര്യങ്ങള്‍ക്ക്‌ മുന്‍തൂക്കം നല്‍കിയും 'ഓ, ഇതൊന്നും ഒരിക്കലും നടക്കാന്‍ പോകുന്നില്ല' എന്ന കരുതല്‍ പ്രമാണക്കാരായ ബ്ലോഗ്‌ സുഹൃത്തുക്കളോട്‌ , ഈ ബൂലോകത്ത്‌ വന്നിട്ട്‌ അധികകാലമാകാത്ത എനിക്ക്‌ പ്രതിഷേധിക്കാനെന്ത്‌ അവകാശം.

ഇവിടെ ഉണ്ട്‌ എന്ന് കരുതിപോന്നിരുന്ന സൗഹൃദങ്ങളെ പല തട്ടിലാക്കി തമ്മില്‍ പോരടിപ്പിക്കുവാനും ഭിന്നിപ്പിച്ച്‌ വിജയിക്കുവാനും ശ്രമിച്ച്‌ തനിയാവര്‍ത്തനം നടത്തുന്ന ആഗോളഭീമന്‍മാരുടെ കൂട്ടുകൃഷിക്ക്‌ വളമാക്കുവാന്‍ നമ്മെയൊക്കെതന്നെയും വെട്ടിയരിഞ്ഞിട്ടാലും,അതിനെതിരെ പ്രതികരിക്കുവാന്‍ ചെറുവിരല്‍പോലുമനക്കാന്‍ കഴിയാത്തവണ്ണം ദുര്‍ബലമായ ഒരു സമൂഹജീവിയാണല്ലോ ഞാനുമെന്ന യാഥാര്‍ത്ഥ്യത്തോടും സ്വന്തം സൃഷ്ടികളെ പിതൃത്വം മറന്ന് യാഹൂ പോലുള്ള കുത്തകകളുടെ അടുക്കളയില്‍ വളര്‍ത്താന്‍ കൊടുക്കേണ്ടിവന്നാല്‍ അതിലുമഭിമാനിക്കുന്ന ഒരു ജനതയിലാണല്ലോ ഞാനുമെന്ന അവസ്ഥയോടുമാണെന്റെ പ്രതിഷേധം,ഒപ്പം ബ്ലോഗെഴുത്തുകളെ വെറും തുറന്ന ഡയറികുറിപ്പുകളെന്ന് മുദ്രചാര്‍ത്തി ചോരണമാരണം നടത്തുന്ന യാഹൂ അടക്കമുള്ള സകല പകര്‍പ്പവകാശലംഘകരോടും..

സമരപന്തല്‍ ഇവിടെ

ഈ വിഷയവുമായി ബന്ധപ്പെട്ട വായനക്ക്‌ ;
1. ബ്ലോഗ്‌ കോപ്പിയടിവിരുദ്ധദിനം

2. പ്രതിഷേധിക്കാം അല്ലേ? കറിവേപ്പില

3. ഇഞ്ചിമാങ്ങ - ഇഞ്ചിപെണ്ണ്

4. കക്കാനും നില്‍ക്കാനും പഠിച്ചവര്‍ - ശേഷം ചിന്ത്യം
5. കടന്നല്‍കൂട്ടില്‍ കല്ലെറിയരുതേ - വിശ്വബൂലോഗം

6. യാഹുവിന്റെ ബ്ലോഗ്‌ മോഷണം -ഹരീ

7. കോപ്പിയടിക്കപ്പുറം - സിബു

8. രണ്ടായിരത്തിയേഴ്‌ മാര്‍ച്ച്‌ അഞ്ച്‌ പ്രതിഷേധദിനം - ഒരു കര്‍ഷകന്‍ സംസാരിക്കുന്നു.
9. Aganist Plagiarism
10. Indian Bloggers Enraged at Yahoo! India?s Plagiarism

അകവും പുറവും - ബ്ലോഗ്കളവ് കാര്‍ട്ടൂണ്‍ -2

2007-03-03T18:53:00.000+01:00

ബ്ലോഗ് കളവ് സമര പന്തലിലേക്ക് ഇന്നത്തെ കാര്‍ട്ടൂണ്‍..അകവും പുറവും അഥവാ ബ്ലോഗ് പാത്ര മൊത്തവ്യാപാരികള്‍

ഈ ചിത്രം പികാസ വെബില്‍

ഈ വിഷയവുമായി ബന്ധപ്പെട്ട വായനക്ക്‌ ;
1. ബ്ലോഗ്‌ കോപ്പിയടിവിരുദ്ധദിനം

2. പ്രതിഷേധിക്കാം അല്ലേ? കറിവേപ്പില

3. ഇഞ്ചിമാങ്ങ - ഇഞ്ചിപെണ്ണ്

4. കക്കാനും നില്‍ക്കാനും പഠിച്ചവര്‍ - ശേഷം ചിന്ത്യം
5. കടന്നല്‍കൂട്ടില്‍ കല്ലെറിയരുതേ - വിശ്വബൂലോഗം

6. യാഹുവിന്റെ ബ്ലോഗ്‌ മോഷണം -ഹരീ

7. കോപ്പിയടിക്കപ്പുറം - സിബു

8. രണ്ടായിരത്തിയേഴ്‌ മാര്‍ച്ച്‌ അഞ്ച്‌ പ്രതിഷേധദിനം - ഒരു കര്‍ഷകന്‍ സംസാരിക്കുന്നു.
9. Aganist Plagiarism
10. Indian Bloggers Enraged at Yahoo! India?s Plagiarism

ബ്ലോഗിലെ കളവ് - സമരപന്തലില്‍ ഞാനും..

2007-03-03T09:32:00.000+01:00

യാഹു വിന്റെ മലയാളം പോര്‍ട്ടലില്‍ തുടക്കത്തിലെതന്നെയുണ്ടായ ബ്ലോഗെഴുത്ത്‌ മോഷണമെന്ന കല്ലുകടി പരക്കെ ചര്‍ച്ചചെയ്യപ്പെട്ടതാണ്‌. അമ്മയെതല്ലിയാലും രണ്ടഭിപ്രായമുണ്ടാകുമെന്നത്‌ പോലെ ഇവിടെയുമുണ്ടായി രണ്ട്‌ ചേരി. അത്‌ ഒരു വിധത്തില്‍ നല്ലത്‌ തന്നെ, പ്രതിപക്ഷമില്ലാതെന്ത്‌ ഭരണപക്ഷം.കോപ്പിറൈറ്റിനെകുറിച്ചൊക്കെ ലേശം വിവരം വെയ്ക്കാന്‍ ഇടയാക്കിയചര്‍ച്ചകള്‍, തര്‍ക്കങ്ങള്‍. അതൊക്കെ കേവലം ചില ബ്ലോഗുകളിലേക്കും വ്യക്തികളിലേക്കും മാത്രം കേന്ദ്രീകരിക്കുകയും പഴയ ബ്ലോഗര്‍മാരില്‍ പലരും മൗനം പാലിക്കുകയും ചെയ്തത്‌ മടുപ്പുളവാക്കിയെന്നതും 'അരിയെത്ര പയറഞ്ഞാഴി' പോലുള്ള മറുപടികളും തമ്മില്‍തല്ലും ഒരിക്കലും ഗുണമാവില്ലന്ന് കണ്ട്‌ മറ്റ്‌പലരുടെയുമൊപ്പം ഞാനും ഇടംകാലിയാക്കി. പക്ഷേ കാര്യങ്ങള്‍ 'ഇപ്പോഴും വഞ്ചി തിരുനക്കര തന്നെ' യെന്നമട്ടിലാണ്‌. മലയാളികളുടെ ബ്ലോഗ്‌ കൂട്ടായ്മക്ക്‌ തുരങ്കം വെക്കുന്ന രീതിയിലേക്കും , വ്യക്തിഹത്യയിലേക്ക്‌ തരം താഴുന്ന അവസ്ഥയിലേക്കും യാഹൂ ഭീമന്‍ നമ്മെ കൊണ്ടെത്തിച്ചിരിക്കുന്നു.

ഇതിനെല്ലാം കാരണമായ ബ്ലോഗ്‌ കോപ്പിയടിക്ക്‌ എതിരെ നടത്തുന്ന മാര്‍ച്ച്‌ അഞ്ചിലെ പ്രതിഷേധത്തിന്‌ ഞാനും കൂടുന്നു, ചില ചില്ലറ കാര്‍ട്ടൂണുകളുമായി. ആദ്യമായിട്ടാണ്‌ നിത്യേന ഉപയോഗിക്കുന്നതെങ്കിലും AutoCAD എന്ന സോഫ്റ്റ്‌ വെയറിലൂടെ കാര്‍ട്ടൂണ്‍ വരക്കാന്‍ ഞാന്‍ ശ്രമിക്കുന്നത്‌ ഇതാദ്യം.

ആദ്യത്തെ കാര്‍ട്ടൂണ്‍ ഇന്ന്.

ഈ ചിത്രം പികാസ വെബില്‍

ഈ വിഷയവുമായി ബന്ധപ്പെട്ട വായനക്ക്‌ ;
1. ബ്ലോഗ്‌ കോപ്പിയടിവിരുദ്ധദിനം

2. പ്രതിഷേധിക്കാം അല്ലേ? കറിവേപ്പില

3. ഇഞ്ചിമാങ്ങ - ഇഞ്ചിപെണ്ണ്

4. കക്കാനും നില്‍ക്കാനും പഠിച്ചവര്‍ - ശേഷം ചിന്ത്യം
5. കടന്നല്‍കൂട്ടില്‍ കല്ലെറിയരുതേ - വിശ്വബൂലോഗം

6. യാഹുവിന്റെ ബ്ലോഗ്‌ മോഷണം -ഹരീ

7. കോപ്പിയടിക്കപ്പുറം - സിബു

8. രണ്ടായിരത്തിയേഴ്‌ മാര്‍ച്ച്‌ അഞ്ച്‌ പ്രതിഷേധദിനം - ഒരു കര്‍ഷകന്‍ സംസാരിക്കുന്നു.
9. Aganist Plagiarism
10. Indian Bloggers Enraged at Yahoo! India?s Plagiarism

ട്രാഫിക്കും കിഷോറും

2007-01-20T09:42:00.000+01:00

തിരുവനന്തപുരത്തേക്ക്‌ വാടകക്കാരനായി എത്തിയപ്പോള്‍ തന്നെ തുടങ്ങിയ സൗഹൃദമാണ്‌ കിഷോറുമായിട്ടുള്ളത്‌. ഏത്‌ പാതിരാത്രിയും, വേണമെങ്കിലതുകഴിഞ്ഞും എന്തത്യാവശ്യത്തിനു വിളിച്ചാലും ഓടിയോ നടന്നോ ബൈക്കിലോ ആവശ്യാനുസരണം എത്തുന്ന ഒരു ഉപകാരി, കോളേജ്‌ ഓഫ്‌ എന്‍ഞ്ചിനീയറിംഗ്‌, തിരുവനന്തപുര (സി.ഇ.റ്റി ) ത്തിന്റെ പൊന്നോമനയും യൂണിയന്‍ ഭാരവാഹിയും ഒക്കെയുമായിരുന്നവന്‍; രണ്ടേ രണ്ട്‌ ദൗര്‍ബല്യം. ഒന്ന് -പാന്‍ പരാഗ്‌, രണ്ട്‌ ട്രാഫിക്‌ പോലീസ്‌.

പാന്‍ പരാഗ്‌ ഒരു മൂന്ന് നാലു പാക്കറ്റൊക്കെ ഒന്നിച്ച്‌ പൊട്ടിച്ച്‌ വായിലോട്ടിട്ട്‌ അതിന്റെ വെള്ളപ്പൊടി ഊതികളയുന്നത്‌ കണ്ടാല്‍, വെറുതെയെങ്കിലും ഒരു പാക്കറ്റ്‌ പൊട്ടിച്ചിട്ട്‌ ഒന്ന് ഊതാന്‍ കാണുന്നവര്‍ക്കും തോന്നും. വണ്ടി റോഡിലിറക്കുന്നവന്റെയെല്ലാം പുറത്ത്‌, പ്രത്യേകിച്ച്‌ ടൂ വീലര്‍, മെക്കിട്ട്‌ കേറുകയും കൈമടക്കിയും നീട്ടിയും വാങ്ങുന്ന തിരുവനന്തപുരത്തെ കുറച്ച്‌ ട്രാഫിക്ക്‌ പോലീസുകാരെ വട്ടംചുറ്റിക്കുകയാണ്‌ പ്രധാനഹോബിയെന്ന് തോന്നും ചിലപ്പോള്‍. ഇക്കൂട്ടത്തിലെ നല്ലവരുമായിട്ട്‌ പുള്ളി നല്ല കമ്പനിയുമാണെന്നത്‌ വിരോധാഭാസം.

ഒരിക്കല്‍ പട്ടം എല്‍.ഐ.സി യ്ക്ക്‌ സമീപം ചെറിയ ഒരാള്‍ക്കൂട്ടം. ബസ്സില്‍ വരികയായിരുന്ന ഞാന്‍ നോക്കിയപ്പോള്‍ ട്രാഫിക്‌ എസ്‌ ഐയോടും ഒരു പോലീസുകാരനോടും എന്തൊക്കെയോ സംസാരിക്കുന്ന കിഷോറും പിന്നെ വേറൊരു ചങ്ങാതിയും. എന്തായാലും അവിടെ ഇറങ്ങി.
“എന്ത്‌ കിഷോറെ പ്രശ്നം..?''
“ഒന്നുമില്ല ബായി, ലൈസന്‍സുണ്ടായിട്ടും ഈ സാറ് എന്നെ വണ്ടി ഓടിക്കാന്‍ സമ്മതിക്കുന്നില്ല”
കിഷോറും ചങ്ങാതിയും ബൈക്കില്‍ വരുന്നു, ആളൊഴിഞ്ഞയിടത്ത്‌ വണ്ടിയൊതുക്കിയിട്ട്‌ ഏമാനും ശിഷ്യനും വണ്ടിപിടുത്തവും 'പിടുത്ത' വും. കിഷോറിന്റെ വണ്ടിയും പിടിച്ചു. ആര്‍.സി ബുക്ക്‌,ടാക്സ്‌ ടോക്കണ്‍, ഇന്‍ഷുറന്‍സ്‌ തുടങ്ങിയവയെല്ലാം അപ്റ്റുഡേറ്റ്‌.(അതവന്റെ മറ്റൊരു ശീലം).
" എന്നാല്‍ പിന്നെ ലൈസന്‍സ്‌ എടുക്ക്‌" എന്നായി. കിഷോര്‍ പോക്കറ്റില്‍ നിന്നും ലൈസന്‍സ്‌ എടുക്കാന്‍ തുനിഞ്ഞപ്പോള്‍ തന്നെ പോലിസുകാരന്‍ തടഞ്ഞിട്ട്‌, കൂടെയുണ്ടായിരുന്ന ചങ്ങാതീടെ ലൈസന്‍സ്‌ ആവശ്യപെട്ടു, അവനാണത്രേ വണ്ടി ഓടിച്ചിരുന്നത്‌.
കിഷോര്‍: “അല്ല, സാറേ, ഞാനാ വണ്ടി ഓടിച്ചിരുന്നത്‌.”
പോ.കാ: “അല്ല, മറ്റേയാളാണ്‌ വണ്ടി ഓടിച്ചിരുന്നത്‌.”
കിഷോര്‍: “സാറിനു തെറ്റി, ഞാനാണ്‌ വണ്ടി ഓടിച്ചിരുന്നത്‌..”
പോ.കാ: “അല്ല, ...”
സംഭവം ഈ ടോണില്‍ മുറുകിയ സീനിലാണ്‌ ഞാനും ആ നാട്ടുകാരുടെയൊപ്പം കൂടുന്നത്‌. തര്‍ക്കം നല്ലോണം മൂത്തു. കിഷോര്‍ എസ്‌.ഐ യോട്‌
"നോക്ക്‌ സാറെ, ഈ സാറു പറയുന്നത്‌, ഞാനല്ല വണ്ടിയോടിച്ചതെന്ന്, ഒപ്പം കൂടെയുള്ളവനോട്‌ "ഡാ, നിന്റെ ലൈസന്‍സ്‌ ഈ സാറിനെ കാണിക്ക്‌"

അവന്‍ ലൈസന്‍സ്‌ എടുത്ത്‌ എസ്‌.ഐ ക്ക്‌ കൊടുത്തു, അതും കൃത്യം.
കിഷോര്‍: “സാറെ ഇപ്പോ ഇവന്‌ ലൈസന്‍സില്ലേല്‍, ഈ സാറു പറയുന്നത്‌ ന്യായം, ഞാന്‍ പറ്റിക്കുകയാണന്ന്. ഇതിപ്പം ഞങ്ങള്‍ക്ക്‌ രണ്ട്‌ പേര്‍ക്കും ലൈസന്‍സുണ്ട്‌, പിന്നെ ഞാനെന്തിന്‌ കള്ളം പറയണം സാറേ, ഞാനാണ്‌ വണ്ടി ഓടിച്ചിരുന്നത്‌ ”
പോലീസുകാരന്‍ : “അല്ല സാറേ, മറ്റേവനാണ്‌ വണ്ടി ഓടിച്ചിരുന്നത്‌.”
കിഷോര്‍: “ദേ, പിന്നേം, എന്നെ ഒരു മാതിരി കള്ളനാക്കരുത്‌ കേട്ടോ, ഞാനാണ്‌ വണ്ടി ഓടിച്ചിരുന്നത്‌”
എസ്‌.ഐ: “സ്ഥലം മെനക്കടുത്താതെ വണ്ടി എടുത്തിട്ട്‌ പോടാ..”(ലൈസന്‍സ്‌ തിരികെ കൊടുക്കുന്നു)
കിഷോര്‍: “അതെന്ത്‌ സാറെ , അങ്ങിനെ പറയുന്നത്‌, ഞാന്‍ വണ്ടിയോടിച്ച്‌ വന്നു, നിങ്ങള്‍ നിര്‍ത്തിച്ചു, എന്നിട്ടിപ്പം, എടുത്തിട്ട്‌ പോടാന്നാ. ഞാനാണ്‌ വണ്ടിയോടിച്ചിരുന്നത്‌.”
പോ.കാ: “നീയല്ല, മറ്റവനാണ്‌ വണ്ടി ഓടിച്ചിരുന്നത്‌.”

തര്‍ക്കം നല്ലോണം മുറുകി, പോലീസുകാരന്‍ കിഷോറിന്റെ വലയില്‍ കുരുങ്ങികഴിഞ്ഞു, എസ്‌.ഐ ക്ക്‌ മിണ്ടാട്ടമില്ല, നാട്ടുകാര്‍ക്കും എനിക്കും നല്ല ഹരം. അവസാനം കൂട്ടത്തിലൊരമ്മാവന്‍ കിഷോറിനോട്‌, “വണ്ടിയെടുത്തിട്ട്‌ പോണം അപ്പീ, എന്തര്‌ തര്‍ക്കം, ഇവറ്റകള്‍ടെ പിരിവ്‌ മൊടക്കണ്ട ”

ഇത്‌ കൂടി കേട്ടതോടെ ഏമാനും ശിഷ്യനും അവരുടെ വണ്ടിയുമെടുത്ത്‌ ഒരു പോക്ക്‌, എന്താ ശേല്‌.ചെറുതായിടൊന്ന് കൂവി നാട്ടുകാരും പിരിഞ്ഞു.

"എടേയ്‌, ആക്ച്വലി എന്താ സംഭവം..? "
"ഒന്നൂല്ലന്റെ ബായി, ഞാന്‍ രാവിലെ അങ്ങോട്ട്‌ പോയപ്പോള്‍ തുടങ്ങിയ പിരിവാ അവന്മാരുടെ. ഇങ്ങോട്ട്‌ വന്നപ്പം ഞാനിവന്‌ വണ്ടിയോടിക്കാന്‍ കൊടുത്തു, അത്ര തന്നെ."
ഇതാണ്‌ കിഷോര്‍.

കിഷോറിന്റെ കൂടെ ബൈക്കില്‍ പോകുമ്പോള്‍, എവിടേലും ട്രാഫിക്‌ ചെക്കിംഗ്‌ എന്ന ഓമനപ്പേരിലുള്ള പിരിവ്‌ കണ്ടാല്‍, പറ്റുമെങ്കില്‍ അവന്‍ അവരുടെ അടുത്തെത്തി ഒന്ന് പരുങ്ങിയശേഷം യു-ടേണ്‍ അടിയ്ക്കും, തൊട്ടടുത്തുള്ള ഏതേലും മുറുക്കാന്‍ കടയ്ക്ക്‌ സമീപം നിര്‍ത്തി പാന്‍-പരാഗ്‌ ചോദിക്കും. ഇവന്റെ വണ്ടി നമ്പര്‍ അറിയാത്ത പോലീസുകാരാണെങ്കില്‍ ഉറപ്പ്‌, ഒരു ജീപ്പോ, ട്രാഫിക്ക്‌ ബൈക്കോ ഉടനെത്തും, എല്ലാം പരിശോധിക്കും, കൂടുന്ന നാട്ടുകാരുടെ മുന്നില്‍ ഇളിഭ്യരായി തിരിച്ച്‌ പോകുകയും ചെയ്യും, ഒപ്പം നമ്പറും നോക്കിവെയ്ക്കും; ഇനിയും അബദ്ധം പറ്റരുതല്ലോ.

കിഷോറിന്റെ ചോദ്യമിതാണ്‌, “ഈ പോലീസുകാരിതെന്തിനാണ്‌ വണ്ടിയുടെ ബുക്കും പേപ്പറും നോക്കുന്നത്‌..?? ”

(അവന്‍റെ കയ്യില്‍ നിന്നും വെറുതേ തല്ല് കൊള്ളണ്ടന്ന് പേടിച്ചിട്ടൊന്നുമല്ല, കിഷോര്‍ യഥാര്‍ത്ഥ പേരല്ല..)

ഒരു ബൂലോക ഗസറ്റ്‌ വിജ്ഞാപനം

2006-10-28T16:15:00.000+01:00

'എടേയ്‌ നീ വാ, നമുക്കൊരു ബാങ്ക്‌ ഡ്രാഫ്റ്റ്‌ എടുത്തിട്ട്‌ വരാം'
ഡ്രാഫ്റ്റിംഗ്‌ ബോര്‍ഡിനു മുകളില്‍ ഒട്ടിച്ച്‌ പേപ്പറില്‍, പണിയൊന്നുമില്ലാത്തതിനാല്‍ കുത്തിട്ട്‌ കളിയ്കുകയായിരുന്ന എനിക്കാ വിളിയൊരാശ്വാസമായിരുന്നു.കൂടപ്പോയാല്‍ രണ്ട്‌ കാര്യം നടക്കും; ചായകുടിയും പിന്നെയൊരു വില്‍സും. ശരി അണ്ണാ, ഞാന്‍ എഴുന്നേറ്റു.

ഞങ്ങള്‍ മേല്‍പറഞ്ഞ മുന്‍കൂര്‍ കലാപരിപാടികള്‍ക്ക്‌ ശേഷം ബാങ്കിലെത്തി, ഡ്രാഫ്റ്റ്‌ എടുക്കാനുള്ള കാര്യപരിപാടികള്‍ തുടങ്ങി.കാശൊക്കെ അടച്ചിട്ട്‌, വൃത്തിയാക്കാത്തത്‌ കൊണ്ടോ, ആരും ഇന്നേവരെ ഇരിക്കാത്തത്‌ കൊണ്ടോ എന്നറിയില്ല പൊടിപിടിച്ച്‌ കിടന്നിരുന്ന ഒരു സോഫയിലിരുന്ന് ആഗോളവല്‍ക്കരണത്തിന്റെ രൂക്ഷവശങ്ങളെ കുറിച്ച്‌ കത്തി ആരംഭിച്ചു, കത്തി, അതിനി ഏതു വിഷയമായാലും ഞങ്ങള്‍ക്കൊരു വീക്‍നെസ്സ്‌ ആയിപോയിരുന്നു. കത്തിക്കിടയിലും കുറുക്കന്റെ കണ്ണ് കോഴിക്കൂട്ടിലെന്നപോലെ കൌണ്ടറിലേക്ക്‌ തന്നെയായിരുന്നു, കാരണം സംസാരിച്ച്‌ സംസാരിച്ച്‌ തമ്പാനൂര്‍ നിന്നും കൊല്ലത്തേക്ക്‌ പോകാനുള്ളതിനു പകരം നാഗര്‍കോവില്‍ പാസഞ്ചര്‍ ട്രെയിനില്‍ കേറി നെയ്യാറ്റിന്‍കര ഇറങ്ങിയ ചരിത്രപുരുഷന്മാരായിരുന്നു ഞങ്ങള്‍.

വലിയ തിരക്കൊന്നും ഇല്ലാതിരുന്നിട്ടും ഞങ്ങളുടെ ഡ്രാഫ്റ്റ്‌ മാത്രമെന്തേ വൈകുന്നതെന്ന ചിന്ത ഇടയ്ക്കിടെ ഉണ്ടായെങ്കിലും സ്‌റ്റേറ്റ് ‌ബാങ്കിന്റെ മഹത്തരമായ സര്‍വ്വീസില്‍ പുളകം കൊണ്ടിരുന്ന ഞങ്ങള്‍ സംസാരം തുടര്‍ന്നു. ഒടുവില്‍ എന്നാലിനിയൊന്നു അന്വേഷിച്ചുകളയാം എന്നു കരുതി കൌണ്ടറില്‍ ചോദിച്ചു. 'എല്ലാ ഡി.ഡി.യും കൊടുത്തല്ലോ, ഒന്നൊഴികെ' എന്ന മറുപടിയും ഒപ്പം നിങ്ങള്‍ക്കൊന്നും ചെവി കേട്ടുകൂടെ എന്നൊരാട്ടും.
'അതിനു നിങ്ങള്‍ വിളിച്ചില്ലല്ലോ ചേട്ടാ'
"അപ്പീ, എതിനേക്കാലും ഉച്ചത്തില്‍ വിളിച്ച്‌ കൂവാനൊന്നും പറ്റൂല്ല കേട്ടാ, കുമാര്‍, കുമാര്‍ എന്നു വിളിച്ചെന്റെ അടപ്പൂരി പോയി കേട്ടാ"
അപ്പോ അതാണ്‌ പ്രശ്നം, ലവന്‍ ചെറുതായി ചൂടുപിടിച്ചു തുടങ്ങി.
'അതിന്‌ എന്റെ പേര്‌ ഉഷസ്‌ കുമാറന്നാണ്‌ അല്ലാതെ കുമാറന്നല്ലല്ലോ'
“തന്നേ; ചെല്ലാ, ഉഷസ്‌ എന്ന് മനുഷ്യന്മാര്‍ക്കാരെങ്കിലും പ്യാരിടുവോ, വല്ല ലോറിക്കോ വീട്ടിനോ ആട്ടോയ്‌ക്കോ ഒക്കെ ചേരും“
ചൂടാവണോ തണുക്കണോ ,അതോ ഇറങ്ങി ഓടണോ എന്ന കണ്‍ഫ്യൂഷനൊടുവില്‍ ഉഷസ്‌ കുമാര്‍ അവന്റെ ചെവിയിലോതിയതൊന്നും ഇവിടെ എഴുതാന്‍ കഴിയില്ല.

ഒരു പേരിലെന്തിരിക്കുന്നു
ഹാ, എനിക്കറിയില്ല. എന്റെ പേര്‌ ഭയങ്കര കുഴപ്പം പിടിച്ച ഒന്നാണോ.
ഇതുവരെ ഒരു ബാങ്ക്‌ അക്കൌണ്ട്‌ പാസ്സ്‌ ബുക്കിലും വെട്ടി തിരുത്തില്ലാത്തതായിട്ടില്ല, അതു പോലെ പലതിലും. പാസ്‌പോര്‍ട്ടിലും എസ്‌.എസ്‌.എല്‍.സി ബുക്കിലുമെന്തോ വ്യത്യാസമൊന്നുമില്ല.
Abdul Aleef എന്നാണ്‌ ഔദ്യോഗികം.Alif എന്ന് സ്വകാര്യവും. പക്ഷേ എന്റെ സ്‌പെല്ലിംഗ് എന്നെപ്പോലെ തന്നെ മിസ്‌റ്റേക്കാണ്‌. Abdul Alif, Abdul Aliph, Abdul Aleep എന്നൊക്കെ എഴുതി വരുന്നത്‌ സഹിക്കാം, മിക്കവരും എന്നെ Abdul Latheef ആക്കികളയും. കാരണം അതു വളരെ പോപ്പുലര്‍ ആയ ഒരു പേരായതുകൊണ്ടാവും.
ഒരു യഥാര്‍ത്ഥ അബ്ദുല്‍ ലത്തീഫും ഞാനുമായി നടന്ന ഫോണ്‍ സംഭാഷണം;
"ഹലോ, അബ്ദുല്‍ ലത്തീഫ്‌ സാറാണോ"
"അല്ലല്ലോ, ഞാന്‍ അബ്ദുല്‍ അലീഫ്‌ ആണ്‌"
"ഞാന്‍ അബ്ദുല്‍ ലത്തീഫ്‌ ആണ്‌"
"ഞാന്‍ ലത്തീഫ്‌ അല്ല, അലീഫ്‌ ആണ്‌"
ആകെ കണ്‍ഫ്യൂഷനടിച്ച അയാള്‍ ഫോണ്‍ വെച്ചു. ശരിക്കും അയാള്‍ എന്നെ തന്നെയാണ്‌ വിളിച്ചത്‌ എന്ന് പിന്നീട്‌ തമ്മില്‍കണ്ടപ്പോള്‍ മനസ്സിലായി.

എന്റെ പേരിലെ ഏറ്റവും പുതിയ സ്‌പെല്ലിംഗ് നൈജീരിയ ഗവണ്‍മന്റ്‌ റെസിഡെന്റ്‌ പെര്‍മിറ്റിലടിച്ച്‌ തന്നിട്ടുണ്ട്‌, Abdul atheef.അലീഫും ലത്തീഫും കൂടി മിക്‍സിയിലിട്ടടിച്ചത്‌ പോലുണ്ട്‌.

അങ്ങിനെ പേരില്‍ പല പല സ്‌പെല്ലിംഗുകളും സ്വന്തമായുള്ള ഈയുള്ളവന്‍ ഇതാ ബൂലോക ഗസറ്റില്‍ ഒരു പേരുമാറ്റ പരസ്യം ചാര്‍ത്തുന്നു.

2006 ആഗസ്റ്റ്‌ മാസം 27നു ചെണ്ട എന്ന പേരിലുള്ള ബ്ലോഗിലൂടെ ബൂലോകത്ത്‌ ബൂജാതനായ ചെണ്ടക്കാരന്‍ എന്ന ഞാന്‍ ചില സാങ്കേതിക കാരണങ്ങളാല്‍ സ്വന്തവും സ്വകാര്യവുമായ നാമധേയം 'അലിഫ്‌' എന്ന പേരിലാവും ഇനി മുതല്‍ ബ്ലോഗുന്നത്‌ എന്ന് ഇതിനാല്‍ തെര്യപ്പെടുത്തികൊള്ളുന്നു. ഈ പേരുമാറ്റം മൂലം എന്റെ പെരുമാറ്റത്തിന്‌ ഒരു മാറ്റവും ഉണ്ടാകില്ലന്നും എന്റെ ബ്ലോഗുകളായ ചെണ്ട, നൈജീരിയ വിശേഷങ്ങള്‍ എന്നിവയും, ഈ പേരുമാറ്റത്തിന്‌ കാരണമായ 'ഗൃഹപാഠം' എന്ന പുതിയ ബ്ലോഗും പതിവുപോലെ തുടരുമെന്നും ഇതിനാല്‍ അറിയിക്കുന്നതിനോടൊപ്പം ഇങ്ങോട്ടുള്ള പെരുമാറ്റം ശക്തമായിതന്നെ തുടരണമെന്ന് അഭ്യര്‍ത്ഥിക്കുകയും ചെയ്യുന്നു.

സാങ്കേതികകാരണം: ഗൃഹപാഠം ഒരു ടെക്‍നോളജി ബ്ലോഗ്‌ ആണ്‌. ഭവനനിര്‍മാണ സാങ്കേതിക വിഷയമായി 'അലിഫ്‌' എന്ന പേരില്‍ വിവിധ മാദ്ധ്യമങ്ങളില്‍ പ്രസിദ്ധീകരിച്ചിട്ടുള്ള ലേഖനങ്ങളില്‍ പരാമര്‍ശവിഷയമായിട്ടുള്ള സംഗതികളും, ഒറ്റയ്ക്കും കൂട്ടായും നടത്തിയിട്ടുള്ള പഠന റിപ്പോര്‍ട്ടുകളില്‍ നിന്നുള്ള കാര്യങ്ങളും കൂടി പോസ്റ്റുകളില്‍ ഉള്‍പ്പെടുത്തണമെന്നുണ്ട്. ചിലത്‌ ഇനിയും പ്രസിദ്ധീകരിക്കണമെന്ന് ആഗ്രഹിക്കുകയും ചെയ്യുന്നു.

സ്വകാര്യം: ഗൃഹപാഠ ത്തിന്‌ ഒരു കൂട്ടുപ്രതികൂടിയുണ്ട്‌. അയാള്‍ക്കും താത്പര്യം ഞാന്‍ അലിഫ്‌ എന്നു തന്നെ അറിയപ്പെടാനാണ്‌.(വീട്ടില്‍കേറേണ്ടതുള്ളതു കൊണ്ട്‌ തത്ക്കാലം അഡ്ജസ്റ്റ്‌ ചെയ്‌തേ പറ്റൂ- ഈ ബ്രാക്കറ്റിലുള്ളത്‌ ബാച്ചിലര്‍ സുഹൃത്തുക്കള്‍ വായിക്കണമെന്നില്ല)

ആത്മഗതം: ഹാവൂ, ചെണ്ടയില്‍ ഒരു പോസ്റ്റ്‌ കൂടിയായി.

ഒരു ബോട്ട് യാത്ര

2006-09-27T14:52:00.000+01:00

"ഇതിനകത്തിനി കുട പിടിക്കണമല്ലോ സാറേ; എന്നാ മഴയാ. ആകെ നനഞ്ഞു കുളിച്ചു, ഹോ നശിച്ച മഴ, നശിച്ച ഈ.." ബഹളം കേട്ടാണയാള്‍ ഉണര്‍ന്നത്‌. താഴ്‌ത്തിയിട്ടിരുന്ന ഷട്ടര്‍ കുറച്ചൊന്ന് ഉയര്‍ത്തി സ്ഥലമെവിടെയാണെന്നു നോക്കി; ഇല്ല, കേശവദാസപുരമായിട്ടേയുള്ളൂ. കോരിച്ചൊരിയുന്ന മഴയുടെ ആരവം തണുത്ത കാറ്റിനൊപ്പം രോമകൂപങ്ങളിലേക്ക്‌ കുത്തിക്കയറുന്നതുപോലെ. ഷട്ടര്‍ പരമാവധി വലിച്ച്‌ താഴ്‌ത്തിയിട്ട്‌ അയാള്‍ പിന്നെയുമൊന്നു മയങ്ങാന്‍ ശ്രമിച്ചു.

എം.സി റോഡിന്റെ വീതികൂട്ടല്‍ തുടങ്ങിയതിനു ശേഷം നരകതുല്യമാണീവഴിയുള്ള യാത്രയെങ്കിലും ബസ്സിനുള്ളിലിരുന്നുള്ള ചെറുമയക്കം അയാള്‍ക്കൊരു ശീലമോ ലഹരിയോ ആണ്‌.ചീത്തയായ ഏതോ ഷട്ടറിനു പകരം തിരുകിവെച്ചിരിക്കുന്ന തകരഷീറ്റിന്റെ അസഹ്യമായ ശബ്ദം അയാളെ അലോരസപ്പെടുത്തികൊണ്ടിരുന്നു.

കുട്ടിക്കാലത്ത്‌ അച്ഛനോടൊപ്പം ആദ്യമായി തിരുവനന്തപുരത്തേക്ക്‌ വന്നത്‌ അയാളോര്‍ത്തു, അതേ, അന്നിവിടെ കേശവദാസപുരത്താണിറങ്ങിയത്‌. മെഡിക്കല്‍ കോളേജില്‍ എന്തോ ശസ്ത്രക്രിയ കഴിഞ്ഞ്‌ കിടക്കുകയായിരുന്ന മാമനെ കാണാനായിരുന്നുവെന്നു തോന്നുന്നു, ഇല്ല ഓര്‍മ്മകള്‍ പിടിതരുന്നില്ല.

അച്ഛനോടൊപ്പം പിന്നെയെത്രയെത്ര യാത്രകള്‍. തന്റെ എല്ലാ ചോദ്യങ്ങള്‍ക്കും ഉത്തരം നല്‍കി മടുത്തിട്ടുണ്ടാകും അച്ഛന്‍, യാത്രകള്‍ തന്റെ പാഠപുസ്തകമാവുകയായിരുന്നു.താന്‍ നിര്‍ബന്ധിച്ചിട്ടാണ്‌ ഒരു ബോട്ട്‌ യാത്രയ്ക്‌ അച്ഛന്‍ സമ്മതിച്ചത്‌.പക്ഷേ അതു അച്ഛനോടൊപ്പമുള്ള അവസാനയാത്രയുമായി.മറിഞ്ഞ്‌ പോയ ബോട്ടില്‍ നിന്നു തന്നെ എങ്ങിനെയോ കരയ്ക്കടുത്തെത്തിച്ച്‌ ഈ ലോകത്തുനിന്നു തന്നെ നീന്തിയകലുകയായിരുന്നുവോ അച്ഛന്‍ ? തന്നെ നടക്കാന്‍ പഠിപ്പിച്ച അച്ഛന്റെകൈവിരലുകള്‍ താണുപോകുന്നതു കണ്ട് നിലവിളിക്കാന്‍ പോലുമാകാതെ വെള്ളത്തിലൊറ്റപ്പെട്ട്‌ പോയ എട്ടുവയസുകാരനെ ആരെക്കെയോ താങ്ങിയെടുത്തു. രക്ഷാബോട്ടുകള്‍ ചീറിയടുക്കുന്നതിന്റെ മുരള്‍ച്ച, ഓടിക്കൂടുന്ന ആള്‍ക്കാരുടെ ആരവം, നിലവിളിശബ്ദത്തിലലിഞ്ഞുപോകുന്ന രക്ഷപെട്ടവരുടെ ദീര്‍ഘനിശ്വാസം, അച്ഛാ,..ദൈവമേ താനെങ്ങിനെ വീണ്ടുമീ നശിച്ച ബോട്ടില്‍ കേറി.? ആള്‍ക്കാര്‍ തിക്കിതിരക്കുന്നു, ചിലര്‍ വെള്ളത്തിലേക്ക്‌ എടുത്ത്‌ ചാടുന്നു; ജനല്‍പ്പഴുതിലൂടെ പുറത്ത് ഓളം വെട്ടുന്ന വെള്ളത്തിലേക്ക്‌ എടുത്ത്‌ ചാടാന്‍ വെമ്പിയ അയാളെ ആരോ തടഞ്ഞു, പതുക്കെ, തെരക്കുകൂട്ടാതെ..!

പതുക്കെ പതുക്കെ അയാളുടെ ബോധമണ്ഡലത്തിലേക്ക്‌ ചിത്രങ്ങള്‍ തെളിഞ്ഞു വന്നു; ഹോ, തമ്പാനൂര്‍ ബസ്‌സ്റ്റാന്‍ഡെത്തിയത്‌ അറിഞ്ഞില്ല!. പുറത്ത്‌ തകര്‍ത്തു പെയ്യുന്ന മഴകുറയാന്‍ കാത്തിരിക്കുന്നവരുടെ കൂട്ടത്തില്‍, വ്യവസ്ഥിതിയെ തെറിവിളിക്കുന്നവരിലൊരാളായി ഒരു വില്‍സ്‌ ഫില്‍ട്ടറിനു അയാളും തീ കൊടുത്തു. ബസ്സിനുള്ളില്‍ പുകവലിപാടില്ലന്ന മുന്നറിയിപ്പക്ഷരങ്ങള്‍ ആ പുകയേറ്റ്‌ മങ്ങിപ്പോയി.

തിരുവനന്തപുരം തമ്പാനൂര്‍ ബസ്സ് സ്റ്റാന്‍ഡ് - ഒരു മഴ കാഴ്ച (പഴയ ചിത്രം, അവസ്ഥയ്ക്ക് മാറ്റമില്ലന്ന് ഇന്നലെത്തെ പത്രവാര്‍ത്ത)

മഴയില്‍ മുങ്ങിയ തലസ്ഥാനം

2006-09-26T11:56:00.000+01:00

കോടികള്‍മുടക്കിയ പദ്ധതികളുടെ പരാജയത്തിന്റെ പര്യായമായി വീണ്ടും തലസ്ഥാന നഗരിയുടെ പ്രധാനയിടങ്ങളായ തമ്പാനൂര്‍, പഴവങ്ങാടി , കിഴക്കേകോട്ട ഭാഗങ്ങള്‍ വെള്ളത്തിലായി.കഴിഞ്ഞ രണ്ടുമൂന്നു വര്‍ഷങ്ങളായി പഠനവും അതിന്മേല്‍ പഠനവും പിന്നെ മലമറിക്കലുമൊക്കെയായി നടന്ന പദ്ധതി നടത്തിപ്പുകള്‍, പഞ്ചനക്ഷത്ര സെമിനാറുകള്‍, സ്ലൈഡ് ഷോകള്‍, പരസ്യപ്രചാരണം. ദിനം പ്രതി മാറ്റി പരിഷ്കരിച്ച് താറുമാറാക്കിയ ട്രാഫിക്ക്. സ്റ്റാര്‍ട്ട് ആക്ഷന്‍ ക്യാമറ പുരോഗതി വിലയിരു‍ത്തല്‍ സന്ദര്‍ശന മാമാങ്കങ്ങള്‍ ! ആമയിഴഞ്ചാന്‍ തോടു വഴി ഒഴുകിപ്പോയ കോടികള്‍ക്ക് കണക്കില്ല , പക്ഷേ മഴവെള്ളത്തിനു ഒഴുകാന്‍ പഴുതില്ലത്രേ. ഇന്നലെ രൂപീകരിച്ച ടാസ്‌ക് ഫോഴ്സ് ഏതൊക്കെയൊ കലുങ്ക് തല്ലിപൊളിക്കാന്‍ പോകുന്നു. അപ്പോഴേക്കും മഴ പോകും, വെള്ളകെട്ടും മാറും. കുത്തിപൊളിച്ചു കോരിവെച്ചിരിക്കുന്നത് വീണ്ടും പഴയ അവസ്ഥയിലേക്കാകും, എങ്കിലല്ലേ അടുത്ത മഴയ്ക് മറ്റൊരു ടാസ്‌ക് ഫോഴ്സിനു സ്‌കോപ്പുള്ളൂ.
പുതിയ സര്‍ക്കാരിനു കൈയ്യൊഴിയാം, ഇതു ഞങ്ങളുടെ പിഴവല്ല , മുന്‍ സര്‍ക്കാരിന്റേ;പഴയ സര്‍ക്കാരിനു പറയാം, ഒരഞ്ച് കൊല്ലം കൂടി തന്നിരുന്നു വെങ്കില്‍! പക്ഷേ എന്തും ഏതും അനുഭവിക്കാന്‍ അനന്തപുരിവാസികള്‍ തയ്യാറായല്ലേ പറ്റൂ. ഈ വികസനത്തിന്റെ പേരില്‍ അവര്‍ എത്രനാള്‍, എത്രയധികം പൊടി തിന്നു, എത്രലിറ്റര്‍ പെട്രോള്‍ അധികമായി കത്തിച്ചു, എത്ര ട്രാഫിക്കേമാന്മാരുടെ ചീത്ത വിളി സഹിച്ചു ;പക്ഷേ ഫലമോ,വീണ്ടും മലിനജലത്തിലൂടെ നീന്തുവാനാണ്‌ യോഗം. പിന്നെയും ശങ്കരന്‍ തെങ്ങില്‍ തന്നെ!

വാര്‍ത്തയ്ക് കടപ്പാട്: കേരള കൌമുദി പി.ഡി.എഫ്. എഡിഷന്‍ 26-09-06

നൈജീരിയന്‍ പാചക 'വിധി' കള്‍.

2006-09-21T19:40:00.000+01:00

ആമുഖം:
കുട്ടിക്കാലത്ത്‌ മണ്ണപ്പം ചുട്ട്‌ കളിച്ചിട്ടുണ്ടെന്നുള്ളതല്ലാതെ പാചകവുമായി യാതൊരുവിധ ബന്ധവുമില്ലായിരുന്നു എനിക്കീ കഴിഞ്ഞ ജൂണ്‍ മാസം 13 വരെയും. അടുക്കളയുമായുള്ള ബന്ധം ഭക്ഷണം കഴിക്കാനും ( അടുക്കളേലിരുന്ന് ഭക്ഷണം കഴിക്കുന്നതൊരു സുഖമാ..) ഭാര്യയെ ശല്യം ചെയ്യാനും ഇടയ്ക്ക്‌ കയറാറുണ്ടെന്നുള്ളതും നിരവധി അടുക്കളകള്‍ രൂപകല്‍പനചെയ്യാന്‍ കഴിഞ്ഞിട്ടുണ്ടന്നുള്ളതും മാത്രമാകുന്നു. ഇപ്പോള്‍ ഈ നൈജീരിയയില്‍, കമ്പനി ഗസ്റ്റ്‌ ഹൌസില്‍ തന്നിരുന്ന ഇറ്റാലിയന്‍ പാസ്തയും പിസായുമൊന്നും എപ്പോഴും കഴിക്കാന്‍ ഇഷ്ടമല്ലാത്തതു കൊണ്ടും(തരമാവാത്തത്‌ കൊണ്ടും)പുറത്തിറങ്ങി ഒരു ചായകുടിക്കാന്‍ പോലും മാര്‍ഗ്ഗമില്ലാത്തതു കൊണ്ടും (തോക്ക്‌, വെടി, വെടി, തട്ടികൊണ്ട്‌ പോകല്‍ ) ഭക്ഷണമില്ലാതെ അധികകാലം ജീവിക്കുവാന്‍ കഴിയില്ലന്നതു കൊണ്ടും പാചകത്തിനുള്ള സൌകര്യങ്ങള്‍ (ആയുധസാമഗ്രികള്‍ ഉള്‍പ്പെടെ ) കമ്പനി തന്നിരിക്കുന്ന വസതിയിലുള്ളതുകൊണ്ടും മാത്രം പാചകം ഒരു വിനോദോപാധിയായെടുത്ത (ദൈവമേ, ഉമേഷ് മാഷ് ) ഒരു 'മാര്യേഡ്‌ ബാച്ചിലറുടെ' (എന്റെ വിസാ സ്റ്റാറ്റസ്‌ അങ്ങിനെയാണ്‌) പാചക 'വിധി' ( ചുരുക്കി തലവിധിയെന്നും വായിക്കാം) യായി കരുതണമെന്ന് അപേക്ഷിക്കുന്നു..ഹോ, ക്ഷീണിച്ചു; ഇനി ഒരു ചായകുടിച്ചിട്ടാവാം (ഞാന്‍ തന്നെ ഉണ്ടാക്കിയത്‌..)

മുന്‍കൂര്‍ ജാമ്യം:
ഇതില്‍ പറഞ്ഞിരിക്കുന്ന പ്രകാരമോ കുറച്ച്‌ കൈയ്യില്‍ നിന്നിട്ട്‌ പരിഷ്കരിച്ചോ എന്തെങ്കിലുമൊക്കെ ഉണ്ടാക്കി തിന്ന്, രാവിലെയോ,ഉച്ചക്കോ, രാത്രിയിലോ ,ഇതിനിടയ്കെപ്പഴെങ്കിലുമോ ആര്‍ക്കെങ്കിലും "അത്യാവശ്യ" ഘട്ടം തരണം ചെയ്യേണ്ടി വന്നാല്‍ ഞാന്‍ ഉത്തരവാദിയായിരിക്കുന്നതല്ല.
സമര്‍പ്പണം:
ഒരു മുട്ടപോലും പൊട്ടാതെ വേവിച്ചെടുക്കാന്‍ കഴിയുന്നില്ലന്നു പരിഭവിക്കുന്ന ബാച്ചിലര്‍ സുഹൃത്തുക്കള്‍ക്കും, ഓണ്‍ലൈന്‍ നിര്‍ദ്ദേശ സഹായം നല്‍കികൊണ്ടിരിക്കുന്ന എന്റെ സഹധര്‍മ്മിണിക്കും.

മുന്നറിയിപ്പുകള്‍: അതു പിന്നെ പറയാം.

ചോറ് അഥവാ കഞ്ഞി
ഒരു നല്ല പാചകക്കാരനാവണോ, നിങ്ങള്‍ ആദ്യം കഞ്ഞി വെച്ചു പഠിക്കണം. കഞ്ഞി വെക്കാന്‍ നിങ്ങള്‍ചോറുണ്ടാക്കാന്‍ ശ്രമിച്ചു നോക്കിയാല്‍ മതി (അനുഭവമാണു ഗുരു)
അരി: 1 ഗ്ലാസ്‌
വെള്ളം: രണ്ട്‌ ഒന്നര ലിറ്റര്‍ മിനറല്‍ വാട്ടര്‍.
പാചക രീതി:
അടുപ്പ്‌ ചൂടാക്കി വെള്ളം കുറച്ച്‌ വലിയ പാത്രത്തില്‍ (വല്യ കുട്ടകമൊന്നുമല്ലേ.!) ഒന്നര ലിറ്റര്‍ വെള്ളമൊഴിച്ച്‌ തിളപ്പിക്കുക. നന്നായി കഴുകി (സോപ്പിടണ്ട) വൃത്തിയാക്കിയ അരി തിളച്ച വെള്ളത്തിലേക്ക് മെല്ലെ ഇടുക. ഇതിനു സ്പൂണോ ചെറിയതവിയോ ഉപയോഗിച്ചാല്‍ കൈപൊള്ളാതെയിരിക്കും. അരിയുടെ അളവിന്റെ ഇരട്ടി വെള്ളം ഉണ്ടായിരിക്കണം. വെള്ളം തിളയ്കുന്നത്‌ നോക്കി നില്‍ക്കണമെന്നില്ല, എന്നു വെച്ച്‌ ഒരുപാട്‌ ദൂരേക്ക്‌ പോകാനോ സ്വയം മറന്നു പോകുന്ന ചാറ്റ്‌, ബ്ലോഗിംഗ്‌, മൊബൈല്‍ പഞ്ചാര യെന്നിവയോ പാടില്ലതാനും. ഇടയ്കിടെ വെള്ളം വറ്റിപ്പോകാതെ നോക്കണം. വെള്ളം ആവശ്യമാകുമ്പോള്‍ ഒഴിച്ച്‌ കൊടുത്താല്‍ മതി, ലവന്റെ തിളയൊന്നടങ്ങും. ഒരു 20-25 മിനുട്ട്‌ (തീയുടെ ചൂടുപോലിരിക്കും, അതുപോലെതന്നെ പലതരം അരിക്കും പല വേവാണ്‌) കഴിയുമ്പോള്‍ സ്പൂണില്‍ കുറച്ച്‌ കോരിയെടുത്ത്‌ വേവു നോക്കുക. ചോറിന്റെ പരുവമാകുന്നതു വരെ ഈ പ്രക്രിയ തുടര്‍ന്നു ഊറ്റിയെടുത്താല്‍ ചോറായി. അവസാനത്തെ തിളയുടെ കൂടെ വളരെ കുറച്ച്‌ ഉപ്പ്‌ പൊടിചേര്‍ക്കുന്ന പതിവെനിക്കുണ്ട്‌, ഒരു ടേസ്റ്റിന്‌.
ഇതിനിടയ്ക്‌ സ്പൂണിലെടുത്ത്‌ നോക്കുമ്പോള്‍ ചോറിന്റെ പരുവം കഴിഞ്ഞെന്നു തോന്നിയാല്‍ കൈവിട്ട്‌ പോയിയെന്നൊന്നും കരുതാതെ കഞ്ഞി കുടിക്കാന്‍ തീരുമാനിക്കുക. ലേശം ഉപ്പ് കൂടിയിട്ട്‌ നന്നായി വേവിച്ച്‌ തവികൊണ്ടൊന്നുടച്ചെടുത്താല്‍ കഞ്ഞി റെഡി. തേങ്ങാപ്പാല്‌ ടിന്നില്‍ കിട്ടുന്നതോ (തേങ്ങാ പിഴിഞ്ഞ്‌ ഒഴിച്ചാലും മതി..!!) തേങ്ങാപാല്‍പ്പൊടി കലക്കിയതോ ചേര്‍ത്താല്‍ നല്ല ടേസ്റ്റായിരിക്കും. (ഇതിനെയാണാവോ പാല്‍കഞ്ഞിയെന്നു പറയുന്നത്‌?)

ചെറുപയര്‍ വിഭവങ്ങള്‍
ചെറുപയര്‍ - 1 ഗ്ലാസ്‌
പച്ചമുളക്‌ - 2-3 എണ്ണം
കറിമസാല പൊടി - 2സ്പൂണ്‍
സവാള -1 എണ്ണം
എണ്ണ 5-6 സ്പൂണ്‍
കടുക്‌ -കുറച്ച്‌
തേങ്ങാപ്പാല്‍ - അര ഗ്ലാസ്‌
ഉപ്പ്‌ -ആവശ്യത്തിന്‌
പാചക രീതി:
ചെറുപയര്‍ 2-3 മണിക്കൂര്‍ മുന്‍പ്‌ തന്നെ വെള്ളത്തിലിട്ട്‌ വെയ്ക്കുക. ഒരു ചെറിയപാത്രത്തില്‍ കഴുകി കുതിര്‍ത്ത്‌ വെച്ചിരിക്കുന്ന പയര്‍ നന്നായി വേവിക്കുക. (പയറിന്റെ അടപ്പിളകുന്നതുവരെ , അതായത്‌ തോട്‌ പൊട്ടുന്നതിനു തൊട്ട്‌ മുന്‍പു വരെ) വേകുന്നതിനോടൊപ്പം കറിമസാല പ്പൊടി ചേര്‍ക്കുക. ഒരു നല്ല തിളകഴിയുമ്പോള്‍ കുറച്ച്‌ ഉപ്പു ചേര്‍ക്കുക. അവസാനം പച്ചമുളക്‌ ഉടച്ചതും ലേശം തേങ്ങാപ്പാലും ചേര്‍ത്ത്‌ ഒന്നു തിളപ്പിച്ച്‌ മാറ്റി വെയ്ക്കുക. ഒരു ഫ്രൈയിംഗ്‌ പാനില്‍ എണ്ണയൊഴിച്ച്‌ (ഞാന്‍ സോയബീന്‍ എണ്ണയാണ്‌ ഉപയോഗിക്കാറ്‌) ചൂടാകുമ്പോള്‍ കടുകിട്ട്‌ പൊട്ടിക്കുക. ചെറുതായി കൊത്തിയരിഞ്ഞ സവാള യിട്ട്‌ നന്നായി മൂപ്പിച്ച്‌ (കടുക്‌ പൊട്ടികഴിഞ്ഞാല്‍ തീ കുറയ്കണം ) ആദ്യം തയ്യാറാക്കി വെച്ചിരിക്കുന്ന കറിയിലേക്ക്‌ ചേര്‍ക്കുക. ചെറുപയര്‍കറി റെഡി.
പക്ഷേ ഇത്‌ ചോറിനല്ലേ പറ്റൂ. (ചപ്പാത്തിക്ക്‌ അസ്സലാണ്‌ട്ടോ) നമ്മള്‍ ചോറു വെച്ച് കഞ്ഞി ആയ സ്ഥിതിക്ക്‌ കുറച്ച്‌ ഡ്രൈയായിട്ടുള്ള ചെറുപയര്‍ വിഭവമാകും നല്ലത്‌. അപ്പോള്‍, കടുകിട്ട്‌ പൊട്ടിച്ച്‌ സവാള (നീളത്തിലരിഞ്ഞതായാലും മതി) യിട്ട്‌ മൂപ്പിക്കുക. തിളപ്പിച്ച്‌ മാറ്റീവെച്ചിരിക്കുന്ന കറിയില്‍ നിന്നും കുറച്ച്‌ വെള്ളം ഊറ്റികളഞ്ഞ്‌ (എന്റെ കറിപ്പൊടിയെല്ലാം പോയല്ലോന്ന് സങ്കടമുണ്ടാവും സാരമില്ല) വെച്ചിരിക്കുന്നത്‌ നമ്മുടെ സവാളമൂപ്പിച്ച്‌ കൊണ്ടിരിക്കുന്നതിലേക്ക്‌ (കുറച്ച്‌ വലിയ പാനാണ്‌ നല്ലത്‌) ഇട്ട്‌ തീ നല്ലോണം കുറച്ച്‌ ഒന്നു ഇളക്കിയെടുക്കുക. ഇതിനിടയില്‍ കുറച്ച്‌ (വളരെ കുറച്ച്‌ ) ഗരം മസാലപൊടിചേര്‍ത്താല്‍ കുറച്ച്‌ കൂടി ടേസ്റ്റ്‌ വരുന്നതായി തോന്നീട്ടുണ്ട്‌. മൂന്ന് നാലു തുള്ളി വെളിച്ചണ്ണ കൂടി ചേര്‍ത്ത്‌ കഞ്ഞിയുടെ കൂടെ അടിച്ച്‌ നോക്കൂ..പഞ്ഞിയും കയറും..ശേ; കഞ്ഞിയും പയറും.
ചെറുപയര്‍ വെറുതേ വേവിച്ച്‌ തേങ്ങാപ്പൊടിയും ഉപ്പും ചേര്‍ത്താല്‍ വൈകുന്നേരത്തെ ചായയുടെ കൂടെ കഴിക്കാം.

ചപ്പാത്തി
കേള്‍ക്കാനും തിന്നാനും നിസാരമായ ഈ ഐറ്റം പഠിച്ചെടുക്കാന്‍ കുറച്ച്‌ പാടുപെട്ടു. ആദ്യപരീക്ഷണത്തിന്റെ ഫലമായി, ഒരു ശ്രീലങ്ക, ഒരു ആസ്ത്രേലിയ, പിന്നെ ഒന്നു രണ്ട്‌ മാലി ദ്വീപു പോലെത്തെ ഡിസൈനര്‍ ചപ്പാത്തികളും തിന്നാന്‍ ഭാഗ്യം സിദ്ധിച്ചു. പക്ഷേ നമ്മള്‍ വിടുമോ..ഇപ്പോ കൃത്യം വൃത്താകൃതി ഒത്തു വരുന്നില്ലങ്കിലും ( എന്റെ ഭാര്യ ഇതെങ്ങെനാവോ ഒപ്പിക്കുന്നത്‌..?) വശങ്ങളൊക്കെ വൃത്തിയായിട്ടുണ്ട്‌, മാത്രമോ പൂരി പോലെ പൊള്ളി വരുന്നതായിട്ടുമുണ്ട്‌.
ചേരുവകളള്‍
‍ഗോതമ്പ്‌ പൊടി - 2 കപ്പ്‌
ഉപ്പ്‌ - പാകത്തിന്‌
വെള്ളം - ആവശ്യത്തിന്‌ (ആവേശത്തിനല്ല)

ഉപ്പ്‌ ചേര്‍ത്ത്‌ പൊടിയിളക്കിയ ഗോതമ്പ്‌ മാവിലേക്ക്‌ വളരെ കുറച്ച്‌ വെള്ളം ചേര്‍ത്ത്‌ കുഴച്ച്‌ തുടങ്ങുക. സൂക്ഷിക്കുക, വെള്ളം അധികമാകരുത്‌. ചെറു ചൂടുവെള്ളം ഉപയോഗിക്കുന്നതാണു നല്ലത്‌. കൈയ്യിലൊട്ടും ഒട്ടുന്നില്ല എങ്കിലും പരത്താനുള്ള മയമുണ്ട് എന്ന പരുവമാകുന്നതു വരെ കുഴയ്ക്കുക. പിന്നെ ബോളുകളാക്കി പരത്തിയെടുക്കുക. പരത്തുമ്പോള്‍ ഒട്ടിപിടിക്കാതിരിക്കാന്‍ (പരത്താന്‍ പി.വി.സി. പൈപ്പാണു നല്ലത്‌ എന്ന് എന്റെ ശ്രീമതി, ഞാനിതു വരെ അനുസരിച്ചിട്ടില്ലാട്ടോ..)കുറച്ച്‌ പൊടി തൂവുന്നതു നല്ലതാണെങ്കിലും അധികമായാല്‍ ചപ്പാത്തി ഭയങ്കര കടുപ്പമുള്ളതായിപ്പോകും.അടുപ്പില്‍ ദോശ പാന്‍ വെച്ച്‌ (അധികം കുഴിവില്ലാത്ത തരം) നന്നായി ചൂടായി വരുമ്പോള്‍, പരത്തി വെച്ചിരിക്കുന്ന ചപ്പാത്തിയുടെ താഴ്‌ഭാഗം തന്നെ ആദ്യം ചൂട്‌ കിട്ടുന്നതു പോലെ ഇടുക. ഒരു 5 സെക്കന്റ്‌, ലവനെ വശം മറിച്ചിടാം. ഒരു ഒന്നര മിനുട്ട്‌, വീണ്ടും മറിച്ചിടുക, ചട്ടുകം കൊണ്ട്‌ ചപ്പാത്തിയുടെ മുകള്‍ ഭാഗത്ത്‌ നന്നായി അമര്‍ത്തി മസാജ്‌ ചെയ്ത്‌ കൊടുക്കുക, കണ്ടൊ പൊള്ളി വീര്‍ത്ത്‌ നല്ല സോഫ്റ്റ്‌ ചപ്പാത്തി. ഇതില്‍ ടൈമിംഗിനു വളരെ പ്രാധാന്യമുണ്ട്‌. ഒത്താലൊത്തു.. ചപ്പാത്തി മാവിന്റെ കൂടെ ലേശം ജീരകപ്പൊടി ചേര്‍ത്താല്‍ കുറച്ച്‌ കൂടി ടേസ്റ്റ്‌ ഉണ്ട്‌.
ഇതില്‍ വിവരിച്ചിരിക്കുന്നത്‌ ഡ്രൈ ചപ്പാത്തിയാണ്‌, അതിഷ്ടമല്ലാത്തവര്‍,എണ്ണയോ, നെയ്യോ പുരട്ടി ചുട്ടടുക്കാവുന്നതാണ്‌.

പരീക്ഷിച്ച മുട്ട വിഭവങ്ങള്‍ ,മീന്‍ വിഭവങ്ങള്‍, ചിക്കന്‍ കറി, കിഴങ്ങ്‌ കറി, ഗോതമ്പ്‌ ഉപ്പുമാവ്‌ തുടങ്ങിയത്‌ അടുത്തതില്‍.

പിന്‍കുറിപ്പുകള്‍ അഥവാ മുന്നറിയിപ്പുകള്‍
1. കൈപൊള്ളിയാല്‍ പുരട്ടാന്‍ ബര്‍നോള്‍, മുറിവിനുള്ള ബാന്‍ഡ്‌ എയ്‌ഡ് തുടങ്ങിയവ കരുതുന്നത്‌ നന്ന്.
2. സവാള അരിയാനുള്ള സ്ലൈസര്‍ ഒക്കെ ഉപയോഗിക്കുമ്പോള്‍ ശ്രദ്ധിക്കുക.
3. വീട്ടില്‍ നിന്നും പോരുമ്പോള്‍ കുറച്ച്‌ അച്ചാര്‍, ചമ്മന്തിപ്പൊടി തുടങ്ങിയവകരുതിയാല്‍ പരീക്ഷണഘട്ടങ്ങളില്‍ ‍പട്ടിണിയാവാതിരിക്കാം.

" പാചക നവാഗതരേ, ഒന്നു മനസ്സിലാക്കുക, ലോകത്തിലൊരു പാചകകുറിപ്പും അതേപോലെ പ്രാവര്‍ത്തികമാക്കാന്‍ പറ്റണമെന്നില്ല, അത്‌ സൃഷ്ടിച്ച ആള്‍ക്ക്‌ പോലും. ഒക്കെ ഒരു കൈപുണ്യമല്ലിയോ, പിന്നെ ഭാഗ്യവും "

പാചക ബ്ലോഗിനികളേ സഹായിക്കൂ.തെറ്റുണ്ടങ്കില്‍ തിരുത്തി തരൂ

എല്ലാവര്‍ക്കും...

2006-09-04T08:00:00.000+01:00

എല്ലാവര്‍ക്കും ഓണാശംസകള്‍..

(ഈ പോസ്റ്റ് ബൂലോകക്ലബ്ബില്‍ നിന്നും പിന്‍‌വലിച്ച് ഇവിടെ ചേര്‍ക്കുകയാണ്‌. ഇതാണു ശരിയെന്നാണ് ചര്‍ച്ചകള്‍ക്കിടയില്‍ തോന്നിയത്. ഇതൊരു മാതൃകയാക്കി ചപ്പുചവറുകളെല്ലാം ക്ലബ്ബില്‍ നിന്നും പിന്‍‌വലിക്കപ്പെടെട്ടെ..ആരവിടെ..!!

അവിടെ എന്തൊക്കെയിടാം എന്നതിനെക്കുറിച്ച് ഒരു ധാരണയായ ശേഷം ക്ലബ്ബിലു പോകുന്നതാണു ബുദ്ധി. സാധാരണ ക്ലബ്ബുകളില്‍ ഓണം കഴിഞ്ഞാണ് അടി..ഇവിടെ ഇപ്പോഴേ തുടങ്ങി, ഓണത്തല്ലാവും...‘ചുമ്മാ ബാ‘ എന്നു വിളിച്ചാണു ക്ലബ്ബിലു കയറ്റിയത്. ആ പോസ്റ്റിന്റെ തലക്കെട്ടു മാറ്റിയാല്‍ തന്നെ പകുതി പ്രശ്നം തീരും.ചര്‍ച്ചകള്‍ നടക്കട്ടെ..പങ്കെടുക്കുവാന്‍ സന്തോഷമേയുള്ളൂ. ബൂലോക കൂട്ടായ്മയില്‍

എല്ലാവര്‍ക്കും സന്തോഷകരമായ ഓണം ആശംസിക്കുന്നു.)

മരണാനന്തര ജീവിതം

2006-08-29T20:37:00.000+01:00

കുഞ്ഞുന്നാളിലെ മദ്രസാ പഠനം. വല്യ വല്യ കാര്യങ്ങളാണു പഠിപ്പിക്കുന്നതെന്ന ഉസ്താദിന്റെ ഗമയും, ഓ നമുക്കിതിലൊന്നും വല്യ കാര്യമില്ലന്ന കുഞ്ഞു മനസ്സും..പക്ഷേ, ഒരു കാര്യം വന്നപ്പോള്‍ ശ്രദ്ധാലുവായി - മരണവും ഖബറിലെ ജീവിതവും. യ്യോ..അങ്ങിനെയും ചില സംഗതികളോ.? ശ്രദ്ധാപൂര്‍വ്വം ശ്രവിച്ചപ്പോള്‍ മനസ്സിലായി..മരണമെന്നൊരു സംഗതിയുണ്ടെന്നും മരണ ശേഷം കുഴിയില്‍ വെച്ച്‌ മണ്ണിട്ട്‌ മൂടികഴിയുമ്പോള്‍ (ആദ്യമൊക്കെ മൊത്തം മണ്ണിട്ട്‌ മൂടുമെന്നാണു കരുതിയിരുന്നത്‌, പിന്നീട്‌ മനസ്സിലായി, കുഴിക്കുമുകളില്‍ പലക വെച്ചടച്ചിട്ട്‌ അതിനു മുകളില്‍ മാത്രമേ മണ്ണിടുകയുള്ളൂ വെന്ന്‌) , മുന്‍കറും നക്കീറും..രണ്ടും നമ്മുടെ മലക്കുകള്‍ , പ്രധാന പരിപാടി ഇരുതോളിലും വിശ്രമവും നല്ലതും ചീത്തയുമായ കാര്യങ്ങള്‍ നാം ചെയ്യുമ്പോള്‍ ലൈവ്‌ റിക്കോര്‍ടിംഗ്‌ അതും വീതം വെച്ച്‌. ഒന്നും വിട്ടു പോകരുതല്ലോ; പ്രത്യക്ഷപ്പെടുന്നു.കൈവശം ,ഇരുമ്പുലക്ക, വാരിക്കുന്തം, വടിവാള്‌..തുടങ്ങിയ ആയുധങ്ങള്‍..മുന്‍പ്‌ റിക്കോര്‍ട്ചെയ്തു വെച്ചിരുന്നതിന്റെ പകര്‍പ്പുംകാണും. പിന്നെ സാധാ ചില ചോദ്യങ്ങള്‍.."മന്‍ റബ്ബുക്ക" - നിന്റെ ദൈവമാര്‌..?" മന്‍ ദീനുക്ക.. " നിന്റെ മതമേത്‌..? സാധായെന്നു പറഞ്ഞെങ്കിലും..ഇഹലോകജീവിതത്തില്‍ നല്ലവനായിട്ട്‌ നടക്കുന്നവര്‍ക്കുമാത്രമേ, പണ്ട്‌ മദ്രസയില്‍ പഠിച്ച ഉത്തരങ്ങളെങ്കിലും ഓര്‍മ്മവരികയുള്ളൂ..ടപ്പ്‌ ടപ്പെ്പന്ന്‌ ഉത്തരമങ്ങോട്ടെത്തിയില്ലങ്കില്‍..ഉയര്‍ന്നു പൊങ്ങും ഇരുമ്പുലക്ക, കുന്തം ആദിയായവ..അല്‍പ്പം മുന്‍പ്‌ ഒരു ഉറുമ്പിനെ പിടിച്ച്‌ കുഴിയാന കൂട്ടിലിട്ട്‌ അതിന്റെ മരണവെപ്രാളം കണ്ട്‌ ആഹ്ലാദിച്ച ഞാനൊന്നു ഞെട്ടി..പതുക്കെ ഇടത്തെ തോളിലൊന്നു അമര്‍ത്തിതടവി..വല്ലതും മാഞ്ഞുപോയാലങ്ങ്‌ പോട്ടന്നേ..

അങ്ങിനെയിരിക്കെ, സ്ഥലത്തെ ഒരു പ്രധാനി ഇഹലോകവാസം വെടിഞ്ഞു..മൂവര്‍സംഘത്തിന്റെ, ങാ അതു പറഞ്ഞില്ല, കുട്ടിപട്ടാളം- നിസ്സാര്‍, റഷീദ്‌ പിന്നെ ഞാനും.നിസ്സാറിനു രണ്ടുവയസ്സ്‌ മൂപ്പുകൂടുമെങ്കിലും ഞാനായിരുന്നു മേജര്‍ ജനറല്‍ ഓഫ്‌ ത്രിമെന്‍ ആര്‍മി, കാരണം പിതാജി എക്സ്‌ മിലിട്ടറി,അങ്ങേരുതന്നെ തോക്കു കണ്ടിട്ടുണ്ടോന്ന് അറിയില്ല, ഞാന്‍ പറഞ്ഞു അവന്മാരെ വിരട്ടി, ഞങ്ങളുടെ വീട്ടില്‍ തോക്കുണ്ടന്ന്. അതുപോട്ടെ, പറഞ്ഞു വന്നത്‌, ഞങ്ങളുടെ പ്രാഥമിക അന്വേഷണത്തിലും എഫ്‌.ഐ.ആറിലും മയ്യത്തായവന്‍ ആളു മോശക്കാരനല്ല..ഏഷണി, പരദൂഷണം, പാര..പിന്നെ,അതിരുമാന്തലില്‍ ഡോക്റ്ററേറ്റും...നമുക്കു പറ്റിയ ഇര.മയ്യത്ത്‌ പള്ളിപറമ്പിലേക്ക്‌ എടുക്കുന്നതും കുഴിയിലേക്കിറക്കുന്നതുമൊക്കെ ശുഷ്കാന്തിയോടെ കണ്ടു. ഈ പിള്ളാര്‍ക്കെന്താ കാര്യമെന്ന് ആരെങ്കിലും പിറുപിറുത്തോ..!
മയ്യത്തടക്കി മനുസന്മാരൊക്കെ ആറടി ദൂരം മാറിക്കഴിയുമ്പോളാണു കലാപരിപാടി ആരംഭിക്കുകയെന്നു നിസ്സാര്‍..മൂന്നടിയെന്ന് മറ്റവന്‍..നമുക്കു ഹൃദയം പടപടാ അടിക്കാന്‍ തുടങ്ങി. അവസാനത്തെ ആളും കടന്നു പോയി..പരസ്പരം കേള്‍ക്കാവുന്ന ഹൃദയമിടിപ്പോടെ ഞങ്ങള്‍ പതുക്കെ പതുക്കെ ഖബറിനടുത്തേക്കു നീങ്ങി.

തലേന്നുപെയ്ത മഴയില്‍ കുതിര്‍ന്നു കിടക്കുന്ന മണ്ണും പള്ളിപറമ്പിലെ പാലമരങ്ങള്‍ക്കിടയിലൂടെ കടന്നുവരുന്ന ചന്ദനത്തിരിയുടെ മണമുള്ള കാറ്റും. കൈയ്യുംകാലുമൊക്കെ വിറക്കുന്നുണ്ട്‌. റഷീദിനെ കാവലേല്‍പ്പിച്ച്‌ ഞങ്ങള്‍ പതുക്കെ മുട്ടു കാലിലിരുന്ന് ഖബറിന്റെ തലഭാഗത്ത്‌ ചെവിയോര്‍ത്തു. ടും..ടും..ഓ അതു നമ്മുടെ ഹൃദയമിടിപ്പ്‌. എന്തോ ഒരു ശബ്ദം കേള്‍ക്കുന്നില്ലേ..കിര്‍..കി..ര്‍..ര്‍.ര്‍.എന്തോ ഞെരിഞ്ഞമരുന്ന പോലെ..ശബ്ദം കൂടിവരുന്നു...കിര്‍..കി..ര്‍..ര്‍.ര്‍.ര്‍.ര്‍. മണ്ണിനു അനക്കം വെച്ചതുപോലെ.അയ്യോ..ഓടിക്കോടാ..റഷീദിന്റെ ശബ്ദം കേള്‍ക്കുന്നുണ്ടെങ്കിലും ശരീരമങ്ങോട്ട്‌ അനങ്ങുന്നില്ല..എങ്കിലും ഖബറിന്റെ മുകള്‍ ഭാഗം വിണ്ടുകീറുന്നതും ഞരിഞ്ഞമരുന്ന ശബ്ദം വലുതാവുന്നതും അറിയുന്നുണ്ട്‌..ചുറ്റും നോക്കാന്‍ വയ്യങ്കിലും മനസ്സിലായി ഞാനൊറ്റയ്ക്കാണന്ന്. പിന്നെ എപ്പഴാ ഉണര്‍ന്നതെന്ന് ഇപ്പോഴും അറിയില്ല.പക്ഷേ ഞാനെന്റെ വീട്ടിലെ കട്ടിലിലായിരുന്നു. ഖബറടക്കം കണ്ട്‌ ഭയന്നതാണന്നാണു വീട്ടുകാര്‍ കരുതിയതു..കൈകാല്‍ വിറയല്‍ അപ്പോഴും മാറിയിരുന്നില്ല. ഉസ്താദ്‌ മന്ത്രിച്ചൂതിയ വെള്ളത്തില്‍ പുനര്‍ജ്ജന്മം..

കുറേ നാളുകള്‍ക്കുശേഷമല്ലേ സംഗതിയുടെ പൊരുളു പിടികിട്ടിയത്‌..അതും വല്യ പട്ടാളത്തില്‍ നിന്ന്..പഴകിയ മാമ്പലകയാണു ഖബറിന്റെ മുകളില്‍ വിരിച്ചിരുന്നത്‌..നനഞ്ഞമണ്ണിന്റെ കൂടിയഭാരത്തില്‍ ഒക്കെ തകര്‍ന്നു വീഴുകയായിരുന്നു.

വാല്‍ക്കഷണം.

അന്തം വിട്ടുള്ള ഓട്ടത്തില്‍ എവിടെയോ മറിഞ്ഞു വീണു നിസ്സാറിന്റെ കാലൊടിഞ്ഞു. പനിച്ചുതുള്ളിയകാരണം റഷീദ്‌ ഒരാഴ്ച മദ്രസയില്‍ വന്നില്ല. പനിപിടിക്കാനുള്ള ബോധം പോലുമ്മില്ലായിരുന്നതു കൊണ്ട്‌ പൂര്‍വ്വാധികം ശക്തിയോടെ മൂന്നു നാലു ദിവസത്തിനു ശേഷം ഞാന്‍ വീണ്ടും മദ്രസയിലേക്ക്‌.

മുറിവാല്‍ക്കഷണം:

റബ്ബേ..ഇതും എഴുതുന്നുണ്ടാവുമല്ലോ..മുന്‍കറും നക്കീറും..!

ചെണ്ടയും ചെണ്ടക്കാരനും വരുന്നേ..യ്..

2006-08-27T09:12:00.000+01:00

ണ്ട്രം..ണ്ടം..ണ്ടം...ഈ ബൂലോകത്തേക്ക്‌ ചെണ്ടയും ഒരു ചെണ്ടക്കാരനും കൂടി വരുന്നുണ്ടേ...യ്‌...
ലേശം...വൈകിപ്പോയോ..ന്നൊരു സംശയം...
ഇല്ലല്ലേ..നിക്ക്‌ തോന്നിതാവും..
ഇങ്ങെനെന്തക്കയോ ഏര്‍പ്പാട് ഉണ്ടന്ന് കേട്ടു..പക്ഷേ, മാതൃഭൂമി വായിച്ചപ്പളല്ലേ..ഇതിന്റെ ഗുട്ടന്‍സ്‌ പിടികിട്ടിയത്‌..ഇവിടെ നൈജീരിയയില്‍ മലയാളത്തിലൊരു സിനിമാ നോട്ടീസെങ്കിലും കിട്ടിയാമതിയെന്നു കൊതിച്ചിരിക്കുമ്പഴാ..ഈ ബൂവുലകത്തെ ക്കുറിച്ചും ബൂലോകവാസികളെ ക്കുറിച്ചുമൊക്കെ വായിക്കാനിടയായത്‌.ഈ ചെണ്ടക്കാരനെ ക്കൂടെ കൂട്ടണേ..!!
ഇനി ചെണ്ട യെ ക്കുറിച്ച്‌..ഹൈസ്കൂള്‍ കാലയളവിലെ ഞങ്ങളുടെ കൈ എഴുത്തു മാസിക യുടെ പേര്‌ "ചെണ്ട" യെന്നായിരുന്നു..പ്രീഡിഗ്രിക്ക്‌ ഒരു ഇന്‍ലന്റ്‌ മാസിക നടത്തി..അതും ചെണ്ട..(നാലു ലക്കമേ ഓടിയുള്ളൂ..) പിന്നെ ഇപ്പോ, ഈ ബൂവുലകത്തിലൂടെ ചുമ്മാ ഒന്നു ചുറ്റിയടിച്ചപ്പോള്‍..
മനസിലായി..എപ്പോ വേണങ്കിലും 'കൊട്ട്‌' കിട്ടാമെന്ന്..!!
"ചെണ്ട യാവുമ്പോള്‍..ആര്‍ക്കും കൊട്ടാല്ലോ..".
പതുക്കെ കൊട്ടണേ..തുടക്കകാരനാണ്‌..

ചെണ്ടക്കാരനെ ക്കുറിച്ചു മറച്ചുപിടിക്കാനൊന്നുമില്ല..
വാസ്തുശില്‍പ്പിയാണെന്നാണു വെപ്പ്‌..ഇവിടെ ഇപ്പോള്‍ നൈജീരിയയില്‍ (ഈ ഭാഗത്തു നിന്നും ആരെയും ബൂവുലകത്തില്‍ കണ്ടില്ല.)പോര്‍ട്ട്‌ ഹാര്‍കോര്‍ട്ട്‌ എന്നയിടത്താണ്‌..ഉദരനിമിത്തം ബഹുകൃത വേഷം..
ജന്മദേശം കൊല്ലം ജില്ലയിലെ പത്തനാപുരം..തിരുവനന്തപുരത്ത്‌ സ്ഥിരവാസം..ഭാര്യ,രണ്ട്‌ കുട്ടികള്‍..പോരേ..(കുട്ടികളല്ല, ആമുഖം ഇത്രയും പോരേന്ന്.!)
അപ്പോ എല്ലാരും കൂടിയൊന്നു കൊട്ടിക്കേ...
ണ്ട്രം..ണ്ടം..ണ്ടം.....ണ്ട്രം..ണ്ടം..ണ്ടം...ണ്ടം..ണ്ടം....